کراچی کے علاقے گلبرگ میں لاپتا ہونیوالی 3 سالہ بچی کو جنسی زیادتی کے بعد قتل کرنے کا انکشاف ہوا ہے، پولیس نے ملزم رکشہ ڈرائیور کو سی سی ٹی وی فوٹیج کی مدد سے گرفتار کرلیا ہے۔
مقتول بچی کے خاندان کے مطابق ان کی کسی سے دشمنی نہیں، بچی کے والد عمرے کی ادائیگی کے لیے سعودی عرب گئے ہوئے ہیں، مقتول بچی 6 بہن بھائیوں میں سب سے چھوٹی تھی۔
یہ بھی پڑھیں: کراچی میں ایک اور درندگی، معصوم بچی زیادتی کے بعد قتل، بوری بند لاش برآمد
ملزم نے بچی کو گلا گھونٹ کرقتل کرنے اورلاش بوری میں بند کرکے پھینکنے کا اعتراف بھی کر لیا ہے، پولیس کے مطابق گلبرگ سے 3سالہ بچی کے قتل کے شبہ میں گرفتار ملزم رکشہ ڈرائیور نصیر نے اعتراف جرم کرلیا ہے۔
پولیس کو دیے گئے بیان کے مطابق ملزم نصیر نے بچی کو گلےمیں پھندا لگاکر قتل کیا اورپھرلاش بوری میں ڈال کر گلی میں پھینک دی، ملزم کی سی سی ٹی وی فوٹیج میں اسے بچی کی لاش بوری میں لے جاتے ہوئے دیکھا جاسکتا ہے۔
مزید پڑھیں:بچی کو زیادتی کے بعد قتل کرنے والے مجرم کو 3 بار سزائے موت کا حکم
پولیس کے مطابق پوسٹ مارٹم رپورٹ میں بھی 3 سالہ بچی سے جنسی زیادتی کی تصدیق ہوئی ہے، گرفتار ملزم نصیر سے مزید تفتیش کی جارہی ہے۔
واضح رہے کہ گلبرگ کی رہائشی 3 سالہ بچی کی لاش 9 اکتوبرکی صبح ملی تھی، جس کا گلا دوپٹے سے گھونٹا گیا تھا، لاش کو ضابطے کی کارروائی کے لیے اسپتال منتقل کیا گیا، جہاں پولیس سرجن نے بچی کا پوسٹ مارٹم کیا۔
پولیس سرجن آفس کے مطابق بچی کی لاش سے درکار نمونے جمع کرکے فورینزک تجزیہ کے لیے بھیج دیے گئے ہیں، ابتدائی پوسٹ مارٹم رپورٹ کے مطابق مقتول بچی سے زیادتی کی تصدیق ہوئی ہے۔
