وزیراعظم پاکستان شہباز شریف اور چین کے وزیراعظم لی چیانگ نے نیو گوادر انٹرنیشنل ایئرپورٹ کا ورچوئل افتتاح کردیا ہے، جس کی تقریب اسلام آباد میں منعقد ہوئی۔
تقریب میں گوادر انٹرنیشنل ایئرپورٹ کا ورچوئل افتتاح کیا گیا، جبکہ پاکستان اور چین کے درمیان مختلف شعبوں میں تعاون کی مفاہمتی یادداشتوں پر دستخط کیے گئے۔
یہ بھی پڑھیں دورہ پاکستان کے ذریعے دونوں ممالک میں وسیع اور گہرے تبادلوں کا منتظر ہوں، چینی وزیراعظم
دونوں ملکوں کے درمیان اسمارٹ کلاس رومز کے حوالے سے دستاویز کا تبادلہ ہوا، سی پیک کے تحت گوادر پر ساتویں جوائنٹ ورکنگ گروپ کے اجلاس کے نکات کی دستاویز کا بھی تبادلہ کیا گیا، جبکہ سی پیک ورکنگ گروپ سے متعلق مفاہمتی یادداشت کی دستاویز کا بھی تبادلہ کیا گیا۔
پاکستان اور چین کے درمیان انسانی وسائل کی ترقی سے متعلق دستاویز کا تبادلہ ہوا، دونوں ملکوں کے درمیان اطلاعات اور مواصلات کے شعبوں میں تعاون سے متعلق مفاہمتی یادداشت طے پائی ہیں۔
اس کے علاوہ آبی وسائل کے شعبے میں بھی مفاہمتی یادداشت پر دستخط ہوئے، دونوں ملکوں کے درمیان سلامتی کے شعبے میں تعاون بڑھانے کی دستاویز کا بھی تبادلہ کیا گیا۔
اس موقع پر چینی وزیراعظم کا کہنا کہ پاکستانی سوسائٹی کے تمام شعبوں کی جانب سے چین کی حمایت کے مشکور ہیں، گوادر انٹرنیشنل ایئرپورٹ کی تکمیل اہم سنگ میل ہے۔
انہوں نے کہاکہ اس منصوبے کی تکمیل کے لیے پاکستان اور چین کی افرادی قوت کی کاوشیں قابل ستائش ہیں، گوادر علاقائی ترقی کا محور ہونے کے ساتھ دونوں ملکوں کی مضبوط دوستی کا بھی عکاس ہے۔
لی چیانگ نے کہاکہ پاکستان کی ترقی کےلیے چین اپنا کردار ادا کرتا رہے گا، پاکستان کے عوام کی خوشحالی ہمارے دل کے بہت قریب ہے۔
یہ بھی پڑھیں چینی وزیراعظم کے اعزاز میں استقبالیہ تقریب، گارڈ آف آنر پیش
واضح رہے کہ چینی وزیراعظم لی چیانگ ایس سی او کانفرنس میں شرکت کے لیے پاکستان پہنچ گئے ہیں، جہاں نور خان ایئربیس پر وزیراعظم شہباز شریف نے ان کا استقبال کیا۔
