وزیر اعلیٰ خیبرپختونخوا علی امین گنڈاپور نے کہا کہ آئینی ترمیم آزاد عدلیہ پر حملہ ہے، اس ترمیم کو نہیں مانتے، اس کے خلاف احتجاج کریں گے۔ اس حوالے سے پورے پاکستان میں احتجاج کا پلان بنا رہے ہیں، احتجاج پورے ملک میں ہوگا، حکومت سے جان چھڑانے تک احتجاج ہوگا۔
وزیر اعلیٰ خیبرپختونخوا علی امین گنڈاپور نے پشاور ہائیکورٹ کے باہر میڈیا سے گفتگو کرتے ہوئے کہا کہ وہ بانی پاکستان تحریک انصاف (پی ٹی آئی) عمران خان سے ملاقات کریں گے، اس کے لیے پورا پاکستان بلاک کردیں گے، اس بار ملک بھر میں فائنل احتجاج کا پلان بنائیں گے۔
مزید پڑھیں: سینیئر ترین جج کو چیف جسٹس نہ بنایا گیا تو ہم ایک بار پھر سڑکوں پر ہوں گے، علی امین گنڈاپور
علی امین گنڈاپور نے کہا کہ آئینی ترمیم میں ووٹ دینے والے غداروں کو پہچان لیا گیا ہے، برے وقت میں سب کا پتا چل رہا ہے۔ پارٹی آج اعلان کرکے شوکاز نوٹس دے گی۔ جن لوگوں نے اپنا ووٹ بیچ دیا ہے ان کے ووٹرز سے کہتا ہوں کہ ان سے اپنا حق لیں۔ پارٹی میں ہر طرح کے لوگ ہوتے ہیں، جو غدار ہے اور ضمیر فروش ہے ان کی پارٹی میں جگہ نہیں ہے۔
انہوں نے کہا کہ آئینی ترمیم جیسے ہتھکنڈے اپنا کر یہ لوگ اپنی مرضی کے لوگ لانا چاہتے ہیں۔ رجیم چینج کے بعد سے ملک کے حالات خراب ہوئے ہیں، اور ابھی مزید خراب ہورہے ہیں۔
وزیر اعلیٰ خیبرپختونخوا نے کہا کہ اب پورے پاکستان سے لوگ نکلیں گے، اور پورے ملک میں احتجاج ہوگا۔ روازنہ روڈ کھولنا، رکاوٹیں ہٹانا ہر کسی کا کام نہیں ہے، خیبرپختونخوا کی عوام اس کام میں ببرشیر ہے۔ ہمارے کارکنان تیار ہیں، جب کال دیں گے تو نکلیں گے۔
یہ بھی پڑھیں: وفاق نے اختیارات کا غلط استعمال کیا جس سے 4 جانیں ضائع ہوئیں، علی امین گنڈاپور
علی امین گنڈاپور نے کہا کہ اپنی گورننس ان سے ٹھیک نہیں ہورہی، ایک کالج کے مالک کو یہ نہیں سنبھال سکتے، اپنے صوبے کے حالات پہلے ٹھیک کریں پھر ادھر بات کریں۔ ن لیگ تو سرمایہ داروں کی پارٹی ہے ان سے کمیشن لیتی ہے۔
’کسی صوبے پر ایسا الزام لگانا ٹھیک نہیں ہے، اس صوبے نے قربانیاں دی ہیں‘۔
انہوں نے مزید کہا کہ مریم نوازاس صوبے کی بہو ہیں، اور صوبے کے خلاف باتیں کررہی ہیں۔ مریم نواز عوام میں جائے تو پتا چلے گا کہ لوگ کہا کہتے ہیں۔ مریم نواز اپنی سیٹ ہاری ہوئی ہیں، یہ تو مینڈیٹ چور ہیں۔
