وزیراعظم محمد شہباز شریف نے فلسطینی طلبہ کو سرکاری اخراجات پر تعلیمی و دیگر تمام سہولیات کی فراہمی کی پیشکش کرتے ہوئے کہا ہے کہ پاکستان ان کا گھر ہے اور پاکستانیوں کے دل ان کے لیے دھڑکتے ہیں۔
یہ بھی پڑھیں: اسکول کے بچوں پر حملہ کھلی جارحیت ہے، اسرائیل کو کڑی سزا دی جائے، وزیراعظم
پاکستان میں زیرتعلیم میڈیکل طلبا کے اعزاز میں بدھ کو اسلام آباد میں رکھی گئی ایک تقریب سے عربی میں خطاب کرتے ہوئے شہباز شریف نے کہا کہ ہم آپ کو خوش آمدید کہتے ہیں اور ہمارے گھر اور تعلیمی ادارے آپ کے لیے حاضر ہیں۔ انہوں نے مزید کہا کہ پاکستان جتنا میرا گھر ہے اتنا ہی آپ کا بھی ہے۔
انہوں نے کہا کہ فلسطینی طلبہ کو پاکستان میں تعلیم کے لیے تمام سہولیات فراہم کی جائیں گی اور پاکستان میں 145 فلسطینی طلبہ کی موجودگی اس معاملے کی شروعات ہے۔
ان کا کہنا تھا کہ فلسطینی طلبہ کو سرکاری خرچ پر تعلیم کی سہولیات فراہم کی جائیں گی اور فلسطین سے مزید طلبہ کو پاکستان لانے اور تعلیم کے لیے اقدامات کو یقینی بنایا جائے گا۔
مزید پڑھیے: پاکستان فلسطین میں فوری غیر مشروط جنگ بندی کا مطالبہ کرتا ہے، وزیر اعظم شہباز شریف
شہباز شریف نے کہا کہ اسرائیل نے بربریت کا مظاہرہ کرتے ہوئے 43 ہزار فلسطینی شہید کردیے ہیں لیکن عالمی برادری غزہ میں جنگ بندی کے لیے اب تک اپنا کردار ادا نہیں کرسکی ہے۔
انہوں نے کہا کہ اسرائیلی فوج اسکولوں، اسپتالوں اور پناہ گاہوں پر بمباری کر رہی ہے اور اس نے اقوام متحدہ اور عالمی برادری کی سفارشات کو ردی کی ٹوکری کی نذر کردیا ہے۔ انہوں نے مزید کہا کہ سیکیورٹی کونسل اور عالمی عدالت بھی اسرائیل کے سامنے بے بس ہے۔
مزید پڑھیں: صیہونی افواج کے ہاتھوں ماری جانے والی 10 سالہ راشا کی وصیت پر من و عن عمل کیوں نہ ہوسکا؟
شہباز شریف نے کہا کہ اسرائیل مسلسل بے گناہ فلسطینیوں کی نسل کشی کر رہا ہے اور ہر شہر اور گاؤں تباہی کا منظر پیش کر رہا ہیں لیکن دنیا ہے کہ فلسطین میں اس جارحیت پر خاموش تماشائی بنی بیٹھی ہے۔
وزیراعظم نے فلسطینی طلبا کو تمام تر سہولیات کی فراہمی کی یقین دہانی کراتے ہوئے کہا کہ پاکستان فلسطینی اور لبنانی بھائیوں کے ساتھ کھڑا ہے۔
