پاکستان علماء کونسل کی بانی پی ٹی آئی عمران خان کی حمایت میں امریکی نمائندگان کے ممبران کے خط کی بھرپور مذمت کرتے ہوئے اسے پاکستان کے داخلی معاملات میں براہ راست مداخلت قرار دیا ہے۔
یہ بھی پڑھیں: 60 سے زائد امریکی ایوان نمائندگان نے عمران خان کی رہائی کے لیے صدر جو بائیڈن کو خط لکھ دیا
چیئرمین پاکستان علماء کونسل حافظ محمد طاہر محمود اشرفی نے اپنے بیان میں کہا ہے کہ امریکی ایوانِ نمائندگان کا خط پاکستان کے داخلی معاملات میں براہ راست مداخلت ہے اور پاکستان علماء کونسل اس خط کو کو مکمل طور پر مسترد کرتی ہے۔
انہوں نے کہا کہ یہ خط پی ٹی آئی کے منافقانہ رویے اور پالیسی کی دلیل ہے۔
مزید پڑھیے: دفتر خارجہ نے عمران خان کی رہائی کے لیے امریکی ایوان نمائندگان کاخط باہمی احترام کے منافی قراردیدیا
حافظ محمد طاہر محمود اشرفی نے افسوس کا اظہار کیا کہ امریکی ایوان نمائندگان کے اراکین مشرق وسطیٰ کی صورتحال بالخصوص ہزاروں فلسطینیوں کی شہادت اور لاکھوں بے گھر افراد پر مجرمانہ خاموشی اختیار کیے ہوئے ہیں۔
ان کا مزید کہنا تھا کہ حکومت پاکستان، عوام، سیاسی اور مذہبی جماعتیں اپنے مسائل خود حل کرنے کی بھرپور صلاحیت رکھتی ہیں۔
حافظ محمد طاہر محمود اشرفی نے کہا کہ مذکورہ خط اوراس کے مندرجات بلاشبہ پاکستان کے اندرونی معاملات میں مداخلت اور خود مختاری کی خلاف ورز ی ہے اور یہ صرف اور صرف صیہونی طاقتوں کے ایما پر لکھا گیا۔
مزید پڑھیں: امریکی صدر کا وزیراعظم پاکستان کے نام خط، سفارتی تعلقات میں مزید بہتری کا عندیہ دیدیا
انہوں نے کہا کہ پاکستان علماء کونسل اور عوام کی جانب سے پاکستان کے خلاف کسی بھی مہم کا بھرپور جواب دیا جائے گا۔
واضح رہے کہ امریکی ایوان نمائندگان کے 60 سے زائد ارکان نے صدر جو بائیڈن کو ایک خط میں سابق وزیراعظم عمران خان سمیت پاکستان میں ’سیاسی قیدیوں‘ کی رہائی کا مطالبہ کیا ہے۔
امریکی ایوان نمائندگان کے رکن گریگ کیسر کی جانب سے لکھے گئے خط میں درجنوں کانگریس مین کے دستخط موجود ہیں جنہوں نے امریکی صدر سے مطالبہ کیا ہے کہ پاکستان کے حوالے سے امریکی پالیسی میں انسانی حقوق کو مرکز بنایا جائے۔
