امریکی صدر کا وزیراعظم پاکستان کے نام خط، سفارتی تعلقات میں مزید بہتری کا عندیہ دیدیا

وزیراعظم شہباز شریف کو امریکی صدر جوبائیڈن کی جانب سے لکھا گیا خط موصول ہوا ہے، جس میں صدر بائیڈن نے انہیں وزارت عظمیٰ کا منصب سنبھالنے پر مبارکباد دی گئی ہے۔

 وزیراعظم شہباز شریف کے منصب سنبھالنے کے بعد امریکی صدر کا یہ پہلا خط ہے جس میں انہوں نے پاکستان کی نومنتخب حکومت کے لیے نیک تمناؤں کا اظہار کیا ہے۔ یہ خط طویل عرصے کے بعد کسی امریکی صدر کا پاکستانی وزیراعظم کو پہلا خط ہے جس میں امریکی صدر نے دونوں ملکوں کے درمیان سفارتی تعلقات میں مزید بہتری کا عندیہ دیا۔

اپنے خط میں جوبائیڈن نے کہا کہ دونوں ممالک کے عوام کے درمیان شراکت داری دنیا اور ہمارے عوام کی سلامتی یقینی بنانے میں نہایت اہم ہے۔

امریکی صدر کا کہنا تھا کہ دنیا اور خطے کو درپیش وقت کے اہم ترین چیلنجز کا سامنا کرنے میں امریکا پاکستان کے ساتھ کھڑا رہے گا، صحت عامہ کا تحفظ، معاشی ترقی اور سب کے لیے تعلیم مشترکہ وژن ہے جسے مل کر فروغ دیتے رہیں گے۔

انہوں نے کہا کہ امریکا پاکستان گرین الائنس فریم ورک سے ماحولیاتی بہتری کے لیے ہم اپنے اتحاد کو مزید مضبوط کریں گے، دونوں اقوام میں استوار مضبوط پارٹنر شپ کو تقویت دیں گے اور دونوں ممالک کے عوام میں قریبی رشتے مزید مضبوط بنائیں گے۔

صدر جوبائیڈن نے کہا کہ امریکا پاکستان کے ساتھ مل کر انسانی حقوق کے تحفظ اور ترقی کے فروغ کے لیے پرعزم ہے، 2022 کے سیلاب کے اثرات سے بحالی، پائیدار زرعی ترقی اور آبی انتظام کے لیے پاکستان کی معاونت جاری رکھیں گے۔