پاکستان شوبز انڈسٹری کی معروف میزبان و اداکارہ نادیہ خان کا کہنا ہے کہ کم عمری میں شادی کر کے انہوں نے اپنے پاؤں پر خود کلہاڑی ماری۔
نادیہ خان نے حال ہی میں نجی ٹی وی کے مارننگ شو میں شرکت کی جہاں انہوں نے اپنی پہلی شادی کے بارے میں کھل کر بات کی، ان کا کہنا تھا کہ شادی ان کی زندگی کا احمقانہ فیصلہ تھا اور اس فیصلے کا ذمہ دار وہ خود کو ٹھہراتی ہیں۔
یہ بھی پڑھیں: خلیل الرحمان قمر کے ساتھ ڈرامہ کرنے سے متعلق سوال پر نادیہ خان نے کیا جواب دیا؟
نادیہ خان نے کہا کہ ان کے والد نے انہیں شادی سے بہت روکا کہ ابھی یہ شادی کا صحیح وقت نہیں ہے جبکہ والدہ کو خواب میں بھی نظر آیا تھا کہ یہ شادی میرے لیے ٹھیک نہیں ہے لیکن وہ ارد گرد نے ماحول کو دیکھ کر سوچنے لگی تھیں کہ سب کی شادیاں ہو رہی ہیں اور وہ اکیلی رہ گئی ہیں، ان کا کہنا تھا کہ والدین کی بات مان کر وہ اس شادی سے بچ سکتی تھیں۔
اداکارہ نے کہا کہ شادی ان کی ضد اور بے وقوفی تھی کیونکہ اس وقت ان کا کیریئر بہت اچھا تھا اور وہ دنیا گھوم رہی تھی لیکن بس اچانک دماغ خراب ہوا اور والدین کے منع کرنے کے باوجود شادی کی اس لیے یہ مکمل طور ان کی اپنی غلطی ہے۔
انہوں نے کہا کہ ان کی شادی کو لومیریج (محبت کی شادی) نہیں صرف پسند کی شادی کہہ سکتے ہیں، ان کے اور پہلے شوہر کے درمیان اتنی زیادہ ذہنی ہم آہنگی نہیں تھی انہوں نے کہا کہ ان کی ساس بہت اچھی تھیں۔
یہ بھی پڑھیں: اداکارہ نادیہ خان نے امیر بننے کا آسان راز شیئر کر دیا
نادیہ نے کہا کہ شادی کا لڈو کھا کر وہ بہت ہی لمبا عرصہ پچھتاتی رہیں لیکن ان کی زندگی کی دو خوبصورت چیزیں ان کے بچے اور مارننگ شوز ہیں۔
واضح رہے نادیہ خان کی پہلی 2 شادیاں طلاق پر ختم ہوئی تھیں، انہوں نے تیسری شادی جنوری 2021 میں کی تھی، ان کی ایک 20 سالہ بیٹی اور 14 سالہ بیٹا بھی ہے۔
