اسلام آباد ہائیکورٹ نے تحریک انصاف کے رہنما علی امین گنڈا پور کے خلاف درج مقدمات کی تفصیلات طلب کرلیں ۔
اسلام آباد ہائیکورٹ میں تحریک انصاف کے رہنما علی امین گنڈا پور کے خلاف درج مقدمات کی تفصیلات فراہمی کیس کی سماعت ہوئی، جسٹس ارباب محمد طاہر نے کیس کی سماعت کی۔
علی امین گنڈا پور کے وکیل شیر افضل مروت عدالت میں پیش ہوئے، جنہوں نے عدالت سے درخواست کی کہ علی امین گنڈا پور پر درج تمام مقدمات کی تفصیلات فراہم کی جائیں۔
عدالت نے فریقین کو نوٹس جاری کرتے ہوئے حکم دیا کہ فریقین جمعہ تک علی امین گنڈا پور کے خلاف درج مقدمات کی رپورٹ پیش کریں، اور کیس کی سماعت جمعہ تک ملتوی کر دی گئی۔
واضح رہے کہ تحریک انصاف کے رہنما علی امین گنڈا پور 6 اپریل کو ڈیرہ اسماعیل خان سے گرفتار کیے گئے تھے، بعد ازاں انہیں اسلام آباد میں درج مقدمے میں پیشی کے لیے اسلام آباد منتقل کیا گیا تھا۔
