اداکارہ سنیتا مارشل نے کہا ہے کہ برصغیر کے 98 فیصد مرد محفل میں اپنی بیویوں کا مذاق اڑاتے ہیں اور ان کی باتوں کو اہمیت نہیں دیتے۔
سنیتا مارشل نے ان خیالات کا اظہار نجی ٹی وی پروگرام میں گفتگو کے دوران ایک خاتون کی شکایت پر ردعمل دیتے ہوئے کیا، جس میں خاتون نے شوہر کی جانب سے دوسروں کے سامنے اس کی رائے کو اہمیت نہ دینے کا ذکر کیا تھا۔
یہ بھی پڑھیں:شرمین علی، سنیتا مارشل اور صائمہ قریشی کا بچوں کو خودمختار بنانے پر زور
اداکارہ کے مطابق بعض شوہر دوستوں کے درمیان بلاوجہ اپنی بیویوں کا مذاق اڑاتے ہیں، جبکہ بیوی سب کے سامنے کوئی مشورہ دے تو شوہر فوراً اسے خاموش کرانے یا اس کی بات کو غلط قرار دینے کی کوشش کرتا ہے، حالانکہ اختلاف کی صورت میں بات بعد میں نجی طور پر بھی کی جاسکتی ہے۔
سنیتا مارشل نے کہا کہ اس رویے کی ایک بڑی وجہ وہ سوچ ہے جس کے تحت مرد اپنی بیویوں کو خود سے کمتر سمجھتے ہیں۔ ان کے بقول زبان کا استعمال بھی اس ذہنیت کی عکاسی کرتا ہے، جہاں بیویاں شوہروں سے عموماً ‘آپ’ کہہ کر بات کرتی ہیں جبکہ شوہر انہیں ‘تم’ کہہ کر مخاطب کرتے ہیں۔
یہ بھی پڑھیں:کیا سنیتا مارشل نے حسن احمد سے بھاگ کر شادی کی؟
انہوں نے کہا کہ اختلافِ رائے کے دوران مردوں اور خواتین دونوں کو اپنے لہجے کا خیال رکھنا چاہیے کیونکہ سخت لہجہ معمولی اختلاف کو جھگڑے میں تبدیل کرسکتا ہے۔
اداکارہ نے اعتراف کیا کہ 98 فیصد کا اعداد و شمار حتمی طور پر درست ہو یا نہ ہو، لیکن دوسروں کے سامنے بیویوں کا مذاق اڑانا اور ان کی رائے کو نظر انداز کرنا معاشرے میں عام رویہ ہے۔
