کچلاک میں دہشتگردوں کے خلاف آپریشن کے دوران 4 سیکیورٹی اہلکار شہید ہو گئے، آپریشن میں 1 دہشتگرد بھی ہلاک ہوا ہے۔ شہید اہلکاروں کی نماز جنازہ ادا کردی گئی۔
کوئٹہ کی تحصیل کچلاک کے علاقے کلی لنڈی میں دہشت گردوں کی کمپاؤنڈ میں موجودگی کی خفیہ اطلاع پر پولیس، کاؤنٹر ٹیررازم ڈیپارٹمنٹ ( سی ٹی ڈی) اور فرنٹیر کارپس (ایف سی) کی جانب سے مشترکہ آپریشن عمل میں لایا گیا۔
پولیس کے مطابق آپریشن کے دوران سیکیورٹی فورسز اور دہشت گردوں کے درمیان فائرنگ کا تبادلہ ہوا جس کے نتیجے میں 4سیکیورٹی اہلکاروں نے جام شہادت نوش کیا جبکہ جوابی فائرنگ سے ایک دہشت گرد ہلاک ہوا۔
ہلاک دہشت گرد اور شہید سیکیورٹی اہلکاروں کی لاشیں سول ہسپتال کوئٹہ منتقل کردی ہیں جہاں شہید اہلکاروں کے جسد خاکی ضروری کارروائی کے بعد ورثاء کے حوالے کر دیے جائیں گے۔
سیکیورٹی فورسز کی جانب سے آپریشن مکمل کر کے دہشتگروں کے زیر استعمال کمپاؤنڈ کو مسمار کردیا گیا ہے۔
وزیراعلیٰ بلوچستان میر عبدالقدوس بزنجو نے آپریشن میں 4پولیس اہلکاروں کے شہید ہونے پر دکھ اور افسوس کا اظہار کرتے ہوئے کہا کہ دہشت گردوں سے مقابلے کے دوران شہید ہونے والے اہلکاروں نے جرات و بہادری کی مثال قائم کی۔
وزیر اعلی عبدالقدوس بزنجو نے کہا کہ دہشت گردی کے خلاف جنگ میں جانوں کا نذرانہ دینے والے قوم کے ہیرو ہیں۔ دہشت گردی کا مکمل خاتمہ قوم اور حکومت کا مشترکہ عزم ہے۔ سیکیورٹی فورسز عزم و استقلال کے ساتھ دہشت گردی کے عفریت کا مقابلہ کر رہی ہیں۔
وزیراعلی بلوچستان نے مزید کہا کہ حکومت شہداء کے خاندانوں کی کفالت اور دیکھ بھال کا فرض پورا کرے گی۔
4 اہلکاروں کی نماز جنازہ
کچلاک کے علاقے کلی لنڈی میں آپریشن کے دوران شہید ہونے والے 4 اہلکاروں کی نماز جنازہ ادا کردی گئی۔ نماز جنازہ میں کمانڈر سدرن کمانڈ، آئی جی ایف سی، آئی جی پولیس سمیت دیگر آفیسران نے شرکت کی۔
