صدر آصف زرداری نے چینی صدر شی جن پنگ کے خیر سگالی کے پیغام پر ان کا شکریہ ادا کرتے ہوئے کہا ہے کہ وہ بہت جلد چین کا دورہ کریں گے۔
ایوان صدر کی جانب سے جاری بیان کے مطابق صدر مملکت آصف علی زرداری نے چینی صدر کے خط میں خیرسگالی کے پیغام پر ان کا شکریہ ادا کیا ہے۔
یہ بھی پڑھیں: وزیراعظم شہباز شریف کے ساتھ ملکر اسٹریٹیجک تعاون کے فروغ اور سی پیک کی تکمیل کا خواہاں ہوں، چینی صدر
صدر آصف علی زرداری نے کہا ہے چین کی قیادت اور عوام کی جانب سے خیرسگالی کے پیغام سے وہ متاثر ہوئے ہیں، وہ مستقبل قریب میں مناسب تاریخ پر چین کا دورہ کریں گے، دورے سے دونوں ممالک کے دیرینہ اور آہنی بندھن کو مزید تقویت ملے گی۔
واضح رہے کہ چند دن قبل چینی صدر شی جن پنگ نے خط میں صدر مملکت کے زخمی ہونے پر اپنی تشویش اور صدر زرداری کی جلد صحتیابی کے لیے نیک خواہشات کا اظہار کیا تھا۔
یہ بھی پڑھیں: ’آپ کے ساتھ کام کرنے کے لیے تیار ہیں‘، چینی صدر کی آصف زرداری کو صدر منتخب ہونے پر مبارکباد
چینی صدر نے اپنے خط میں پاک چین دوستی کی گہرائی کا بھی اعادہ کیا، انہوں نے صدر آصف علی زرداری کو چین کا دورہ کرنے کی گرمجوشی سے دعوت بھی دی تھی۔
