جی ایچ کیو حملہ کیس میں نامزد ملزمان کے بیرون ملک سفر پر پابندی عائد

راولپنڈی کی انسداد دہشتگردی عدالت نے جی ایچ کیو حملہ کیس کے تمام ملزمان کے بیرون ملک سفر پر پابندی عائد کردی۔

عدالت کی جانب سے ملزمان کو بیرون ملک جانے سے روکنے کے لیے ڈی جی امیگریشن کو خط بھجوا دیا گیا۔

یہ بھی پڑھیں جی ایچ کیو حملہ کیس: عدالت کا عمران خان کی حاضری ویڈیو لنک سے لگوانے کا حکم

عدالت کے مطابق جی ایچ کیو حملہ کیس میں نامزد ملزمان کی بیرون ملک روانگی عدالتی اجازت سے مشروط ہے، ملزمان کے بیرون ملک سفر پر پابندی اے ٹی سی ایکٹ کی دفعہ 28 اے کے تحت عائد کی گئی۔

میڈیا رپورٹس کے مطابق بانی پی ٹی آئی عمران خان نے جی ایچ کیو حملہ کیس کے سلسلے میں انسپکشن نوٹ بھی اپنے دستخط کے ساتھ وصول کرلیا ہے۔ اس موقع پر وکلا صفائی کی جانب سے اعتراض اٹھایا گیا کہ ملزمان کی فہرست میں عمران خان کا نام موجود نہیں تھا، یہ دستاویز ٹمپرڈ شدہ ہے۔

یاد رہے کہ عدالت نے جی ایچ کیو حملہ کیس کے ملزمان پر فرد جرم عائد کرنے کے لیے 25 نومبر کی تاریخ مقرر کی ہے۔ مقدمے میں نامزد 23 ملزمان کو اشتہاری قرار دے کر دائمی وارنٹ گرفتاری بھی جاری کیے گئے ہیں۔

23 اشتہاری ملزمان میں پی ٹی آئی رہنما مراد سعید، ذلفی بخاری، شہباز گل اور دیگر شامل ہیں۔

یہ بھی پڑھیں آئین میں کہاں لکھا ہے کہ جی ایچ کیو کے سامنے احتجاج کرنا جرم ہے؟ عمران خان

یہ بھی یاد رہے کہ جی ایچ کیو حملہ کیس میں 120 ملزمان ٹرائل کا سامنا کرنا کررہے ہیں۔