پاکستان تحریک انصاف (پی ٹی آئی) کے بانی عمران خان نے کہا ہے کہ 24 نومبر کو احتجاج کی فائنل کال صرف پی ٹی آئی کے لیے نہیں ہے، پاکستان بھر کے عوام اس روز اپنے حقوق کے لیے باہر نکلیں۔
سابق وزیراعظم عمران خان کی ہمشیرہ علیمہ خان نے اڈیالہ جیل کے باہر میڈیا سے گفتگو کرتے ہوئے بانی پی ٹی آئی کا پیغام سامنے لایا۔
یہ بھی پڑھیں عمران خان کی فائنل کال، کیا پی ٹی آئی احتجاج کو دھرنے میں بدل پائے گی؟
انہوں نے کہاکہ عمران خان نے 24 نومبر کو پاکستان بھر کے عوام کو احتجاج کے لیے باہر نکلنے کی دعوت دی ہے، یہ احتجاج صرف پی ٹی آئی کا نہیں ہے۔
علیمہ خان کے مطابق عمران خان کا مؤقف ہے کہ 8 فروری کو ہونے والے عام انتخابات میں عوام نے پی ٹی آئی کو ووٹ دیا لیکن ہمارا مینڈیٹ چرا کر چوروں کو ایوان میں بٹھا دیا گیا۔ ایسے اقدامات سے قوم کو غلام بنا دیا گیا ہے اب لوگوں کو اپنے اور اپنے بچوں کے لیے گھروں سے باہر نکلنا ہوگا۔
عمران خان کی ہمشیرہ نے کہاکہ عمران خان کا مؤقف ہے کہ اس وقت ملک میں میڈیا اور جوڈیشری کو تباہ کردیا گیا ہے، میڈیا کا گلا گھونٹنے کے لیے وی پی این پر بھی پابندی لگا دی گئی۔
انہوں نے کہاکہ عمران خان نے 24 نومبر کو اوورسیز پاکستانیوں کو بھی احتجاج کرنے کا کہا ہے اور اپیل کی ہے اوورسیز پاکستانیوں کو ملک کا احساس ہونا چاہیے۔
علیمہ خان کے مطابق عمران خان نے اوورسیز پاکستانیوں کو کہا ہے کہ وہ 24 نومبر کو اپنے اپنے ملکوں میں نکل کر احتجاج ریکارڈ کرائیں اور کہیں کہ یہ جو ظلم ہورہا ہے یہ ہمارے لیے قابل قبول نہیں۔
صحافی نے جب سوال کیاکہ پرویز الٰہی پردہ اسکرین سے کیوں غائب ہیں؟ تو اس کے جواب میں انہوں نے کہاکہ مجھے اس حوالے سے کچھ معلوم نہیں۔
یہ بھی پڑھیں اس بار خیبرپختونخوا کے نوجوان عمران خان کو جیل سے نکالنے کا تہیہ کرچکے، بیرسٹر سیف
واضح رہے کہ بانی پی ٹی آئی عمران خان نے 24 نومبر کو اسلام آباد میں احتجاج کی کال دی ہے، اور کہا ہے کہ اب ہم مطالبات کی منظوری تک واپس نہیں جائیں گے۔
