خیبرپختونخوا پولیس کے افسران اور اہلکاروں کے لیے ایک ضابطہ اخلاق جاری کیا گیا ہے جس میں انہیں سیاسی سرگرمیوں سے دور رہنے کی ہدایت کی گئی ہے۔
ڈی آئی جی پی آپریشنز خیبرپختونخوا نے پولیس افسران کو بذریعہ خط ہدایت کی ہے کہ پولیس اہلکاروں بشمول گنرز کو کسی بھی سیاسی اجتماع میں شریک ہونے سے منع کیا جائے۔
یہ بھی پڑھیں: 24نومبر احتجاج: وزارت داخلہ پاکستان نے چیف سیکریٹری خیبرپختونخوا کو اہم مراسلہ لکھ دیا
خط میں کہا گیا ہے کہ کوئی پولیس اہلکار صوبے سے باہر کسی بھی واقعہ میں کسی بھی حیثیت سے کوئی کردار ادا نہیں کرے گا، پولیس کا فرض ہے کہ غیرسیاسی رہے اور قانون کی حکمرانی کو برقرار رکھے۔
خط میں کہا گیا ہے کہ ہم آئین اور ملکی قوانین کے مطابق غیرجانبداری سے فرائض سرانجام دینے کے پابند ہیں، پولیس اہلکار زبردستی یا غیرضروری اثر و رسوخ کے خلاف مزاحمت کرنے کے پابند ہیں۔
یہ بھی پڑھیں: خیبرپختونخوا کی سرکاری ملازمتوں میں خواجہ سراؤں کا کوٹہ مختص
ڈی آئی جی پی آپریشنز خیبرپختونخوا نے خط میں مزید کہا کہ سرکاری وسائل یا اختیار سیاسی جماعت کی حمایت کے لیے استعمال نہیں کیا جانا چاہیے، س طرح کے طریقوں میں ملوث ہونا ادارے کے اخلاقی معیار کو مجروح کرتا ہے۔
خط میں کہا گیا ہے کہ تمام ملازمین پیشہ ورانہ طریقے سے کام کریں اور دی گئی ہدایات پر عمل درآمد یقینی بنائیں، کوئی بھی افسر یا اہلکار خلاف ورزی کرتے پایا گیا تو اس کے خلاف کارروائی ہوگی۔
