اسلام آباد ہائیکورٹ نے توشہ خانہ ٹو کیس میں ضمانت منسوخی کی ایف آئی اے کی درخواست پر بانی تحریک انصاف عمران خان کی اہلیہ بشریٰ بی بی کو نوٹس جاری کرکے آئندہ ہفتے ان سے جواب طلب کرلیا۔
اسلام آباد ہائیکورٹ کے جج جسٹس میاں گل حسن اورنگزیب نے ایف آئی اے کی درخواست پر سماعت کی۔ دورانِ سماعت ایف آئی اے پراسیکیوٹر ذوالفقار عباس نقوی نے کہا کہ بشریٰ بی بی اسلام آباد ہائیکورٹ سے ملنے والی ضمانت کا غلط استعمال کر رہی ہیں۔
مزید پڑھیں: توشہ خانہ 2 کیس: عمران خان اور بشریٰ بی بی کی بریت کی درخواستیں مسترد
پراسیکیوٹر نے کہا کہ بشریٰ بی بی ٹرائل کورٹ کی اکثر سماعتوں میں پیش نہیں ہو رہیں۔ عدالت نے ایف آئی اے کی درخواست پر بشریٰ بی بی کو نوٹس جاری کرکے سماعت آئندہ ہفتے تک ملتوی کردی۔
گزشتہ روز اسلام آباد ہائیکورٹ نے توشہ خانہ ٹو کیس میں عمران خان کی اہلیہ بشریٰ بی بی کی ضمانت منسوخی کے لیے ایف آئی اے کی درخواست کو آج سماعت کے لیے مقرر کیا تھا۔
یہ بھی پڑھیں ایف آئی اے نے توشہ خانہ 2 ریفرنس میں بشریٰ بی بی کی ضمانت کا فیصلہ سپریم کورٹ میں چیلنج کردیا
تاہم، ایف آئی اے نے ضمانت منسوخی کے لیے دائر درخواست پر مؤقف اپنایا تھا کہ بشریٰ بی بی کی مسلسل عدم پیشی پر ضمانت منسوخ کی جائے۔ عدالت نے آرڈر میں لکھا تھا کہ ملزمہ کی جانب سے ضمانت کا غلط استعمال نہیں کیا جائے گا۔
درخواست میں کہا گیا کہ بشریٰ بی بی ضمانت ملنے کے بعد اکثر سماعتوں میں پیش نہیں ہورہیں، اس لیے عدالت ان کی ضمانت منسوخ کرنے کا حکم جاری کرے۔
