بلوچستان کے ضلع نوشکی کے علاقے زرین جنگل سے اغوا ہونے والے 6 مزدوروں کو بحفاظت بازیاب کرالیا گیا ہے۔
ضلعی انتظامیہ کے مطابق، مزدوروں کو 28 نومبر کی رات مسلح افراد نے ڈیم پر کام کرتے ہوئے اغوا کیا تھا، گزشتہ شب مزدوروں کو لیویز فورس کی مدد سے زرین جنگل سے بازیاب کروایا گیا۔
یہ بھی پڑھیں: دکی کوئلہ کان حملہ، کانکنی معطل، ہزاروں مزدوروں کے بےروزگار ہونے کا خدشہ
نوشکی ضلعی انتظامیہ کا کہنا ہے کہ مزدوروں کو نوشکی انتظامیہ اور لیویز فورس کی کوشش سے بحفاظت بازیاب کرایا گیا ہے۔ بازیاب کرائے گئے مزدوروں کا تعلق کوئٹہ سے ہے۔
واضح رہے کہ جمعرات اور جمعہ کی درمیانی شب مسلح افراد نے نوشکی کے علاقے زرین جنگل سے 6 مزدوروں کو اغوا کرلیا تھا، مسلح افراد نے تعمیراتی کمپنی کی مشینری کو بھی نقصان پہنچایا تھا۔
یہ بھی پڑھیں: پنجاب کے مزدوروں کے لیے بلوچستان ’نوگو ایریا‘، وہاں مزدوری سے بھوکے رہنا بہتر ہے، اہل خانہ
مسلح افراد نے وہاں قائم لیویز چیک پوسٹ پر بھی حملہ کیا تھا اور لیویز اہلکاروں سے اسلحہ چھیننے کے علاوہ مزدوروں کے کیمپ کو نذر آتش بھی کردیا تھا۔
