امریکا کے موقر جریدے ٹائم میگزین نے پاکستان کی وفاقی وزیر برائے موسمیاتی تبدیلی شیری رحمان کو سال 2023 کی دنیا کی 100 با اثر ترین شخصیات میں شامل کیا ہے۔
اس حوالے سے جریدے کی جانب سے سنہ 2023 کی با اثر ترین شخصیات کی فہرست جاری کی گئی ہے جس میں رہنماؤں کی کیٹیگری میں شیری رحمان کا چھٹا نمبر ہے۔
ٹائم میگزین کی ویب سائٹ پر ایک پیغام میں کہا گیا ہے کہ عالمی سطح پرکاربن اخراج میں پاکستان کا حصہ انتہائی معمولی ہے لیکن ماحولیاتی بحران کے سبب سنہ 2023 میں پاکستان کا ایک تہائی حصہ سیلاب میں ڈوب گیا تھا۔
میگزین نے مزید لکھا کہ شیری رحمان نے مصر میں نومبر میں منعقدہ کوپ 27 اجلاس میں ان سیلاب زدگان کے لیے آواز اٹھائی جو قدرتی آفت کے ہاتھوں اپنا سب کچھ گنوا چکے تھے۔ پیغام میں مزید کہا گیا کہ مذکورہ اجلاس میں شیری رحمان نے اپنی پرجوش تقاریر اور بات چیت کے ذریعے اس ناانصافی کو ختم کیے جانے کے سلسلے میں مندوبین کو قائل کیا۔
پیغام میں مزید کہا گیا کہ اجلاس میں ایک تاریخی فیصلے کے ذریعے عالمی برادری متفق ہوئی کہ قدرتی آفات کا سامنا کرنے والے ممالک کے لیے نقصان اور تباہی فنڈ قائم کیا جانا چاہیے۔
ٹائم میگزین کا کہنا ہے کہ یہ ماحولیاتی انصاف کی جانب ایک بڑا قدم ہے تاہم ابھی مزید کاوشوں کی ضرورت ہے جس کے لیے شیری رحمان جیسی شخصیات کی ضرورت ہوگی۔
