سندھ ہائیکورٹ نے 26ویں آئینی ترمیم کے خلاف درخواستیں سماعت کے لیے منظور کرلی ہیں۔
سندھ ہائیکورٹ میں 26ویں آئینی ترمیم کے خلاف دائر درخواستیوں سے متعلق سماعت ہوئی، چیف جسٹس سندھ ہائیکورٹ محمد شفیع صدیقی نے آبزرویشن دی کہ 26 ویں آئینی ترمیم کے خلاف دائر درخواستیں ریگولر بینچ سن سکتا ہے۔
یہ بھی پڑھیں: 26 ویں آئینی ترمیم سنگین خامی کا انکشاف ،کیا اب 27ویں ترمیم کیجائے گی؟
ڈپٹی اٹارنی جنرل نے عدالت کو بتایا کہ یہ درخواستیں آئینی بینچ میں زیر سماعت ہونی چاہئیں، چیف جسٹس نے ریمارکس دیے کہ آپ جواب جمع کروا دیں، ہم دیکھ لیں گے۔
وکیل درخواست گزار بریسٹر علی طاہر نے عدالت کو بتایا کہ آئین سے متصادم قانون کے خلاف درخواست ریگولر بینچ سن سکتا ہے، سندھ ہائیکورٹ کچھ دن پہلے فیصلہ دے چکی ہے ، عدالت نے گذشتہ سماعت پر وفاقی حکومت سے جواب طلب کیا تھا۔
ڈپٹی اٹارنی جنرل ضیا مخدوم نے عدالت کو بتایا کہ کابینہ ڈویژن کا جواب جمع کروا دیا ہے، لا ڈویژن کے جواب کا انتظار ہے، عدالت نے ریمارکس دیے کہ سندھ ہائیکورٹ نے ریگولر بینچ کے دائرہ اختیار سے متعلق تفصیلی فیصلہ جاری کیا ہے۔
یہ بھی پڑھیں: 26ویں آئینی ترمیم کیخلاف درخواستوں کی سماعت اسی ہفتہ کی جائے، 2 سینیئر ججوں کا چیف جسٹس سے مطالبہ
ڈپٹی اٹارنی جنرل نے عدالت کو بتایا کہ آج تو فوری سماعت کی استدعا ہے، تاریخ دیدیں، چیف جسٹس محمد شفیع صدیقی نے ریمارکس دیے کہ ہمیں نا بتائیں ہمیں کیا کرنا ہے، عدالت نے ڈپٹی اٹارنی جنرل کو اعتراضات تحریری طور پر جمع کروانے کی ہدایت کرتے ہوئے درخواستوں کی سماعت موسم سرما کی تعطیلات کے ایک ہفتے بعد مقرر کرنے کی ہدایت کردی۔
عدالت میں کابینہ ڈویژن کے جمع کرائے گئے جواب کے مطابق کابینہ ڈویژن کا کام وزارتوں کی سمری کابینہ اور اس کی کمیٹیوں میں پیش کرنا ہوتا ہے ، کابینہ ڈویژن کے کام سے درخواست گزار متاثر نہیں ہوا ہے، کابینہ ڈویژن کا نام بطور فریق خارج کیا جائے۔
