پاکستان تحریک انصاف (پی ٹی آئی) کی پارلیمانی پارٹی کے اجلاس کی اندرونی کہانی سامنے آگئی۔
ذرائع کے مطابق پی ٹی آئی پارلیمانی پارٹی اسپیکر قومی اسمبلی کے ذریعے مذاکرات کرنے کی خواہشمند ہے۔
یہ بھی پڑھیں حکومت سے مذاکرات میں شرط نہیں مطالبات رکھیں ہیں، چیئرمین پی ٹی آئی
پارلیمانی پارٹی نے تجویز دی ہے کہ مذاکراتی کمیٹی کو حکومت سے براہِ راست مذاکرات کی بات سے گریز کرنا چاہیے۔
ارکان نے تجویز دی کہ پی ٹی آئی کمیٹی کے ارکان اسپیکر کو مذاکرات کرنے کی اطلاع کردیں، اسپیکر کو بتادیا جائے کہ ہم مذاکرات کے لیے تیار ہیں۔
ذرائع کے مطابق اجلاس میں کہا گیا کہ اسپیکر کے ذریعے بات چیت کرنے سے اندازہ ہوسکے گا کہ حکومت سنجیدہ ہے یا نہیں۔
پارلیمانی پارٹی کے اراکین نے کہاکہ بانی پی ٹی آئی عمران خان نے مذاکراتی کمیٹی بنائی ہے تو پیش رفت بھی ہونی چاہیے، تاہم مذاکرات کی خواہش سے یہ تاثرنہیں جانا چاہیے کہ ہم مذاکرات کے بغیر نہیں رہ سکتے۔
ذرائع کے مطابق ارکان نے کہاکہ اسپیکر قومی اسمبلی اس وقت مذاکرات میں اہم کردار ادا کرسکتے ہیں۔
واضح رہے کہ بانی پاکستان تحریک انصاف عمران خان حکومت کے ساتھ مذاکرات کے لیے آمادہ ہوگئے ہیں اور ایک کمیٹی بھی تشکیل دے دی ہے، تاہم ابھی تک باضابطہ بات چیت کا آغاز نہیں ہوا۔
یہ بھی پڑھیں وفاقی وزیر کی حکومت اور پی ٹی آئی کے درمیان رابطوں اور مذاکرات کی تردید
دوسری جانب اسپیکر قومی اسمبلی سردار ایاز صادق نے کہا ہے کہ حکومت اور پی ٹی آئی کے درمیان مذاکرات کے لیے میرا دفتر اور گھر ہر وقت کھلے ہیں۔
