انٹرنیشنل کرکٹ کونسل (آئی سی سی ) نے بھارت اور پاکستان کے درمیان چیمپیئنز ٹرافی 2025 اور 2027 کے آئی سی سی ایونٹس کے لیے ہائبرڈ ماڈل کا اعلان کر دیا ہے۔ پاکستان آئی سی سی کے تمام ایونٹس کے لیے بھارت کا دورہ نہیں کرے گا۔ ساتھ ہی ساتھ آئی سی سی نے 2028 کے ویمن ٹی20 ورلڈ کپ کی میزبانی بھی پاکستان کو دیدی ہے۔
انٹرنیشنل کرکٹ کونسل (آئی سی سی) نے آخرکار 2025 کی چیمپیئنز ٹرافی میں تعطل ختم کرنے میں کامیابی حاصل کرلی، جس میں ہائبرڈ ماڈل پر اتفاق کیا گیا ہے جس کے تحت 8 ٹیموں کے ایونٹ میں بھارت کے میچ کسی نیوٹرل مقام پر ہوں گے۔
آئی سی سی کی جانب سے جاری اعلامیے کے مطابق پاکستان کی جانب سے پیش کیے جانے والے فارمولے کے مطابق بھارت کے لیے نیوٹرل مقام قبول کرنے کی صورت میں بھارت کی میزبانی میں ہونے والے آئی سی سی ایونٹس میں پاکستان کے بھارت کے ساتھ میچز بھی نیوٹرل مقام پر ہوں گے۔
مزید پڑھیں: آئی سی سی نے چیمپئنز ٹرافی اور27-2024 تک کے تمام ایونٹس کے لیے ہائبرڈ ماڈل کا اعلان کر دیا
واضح رہے کہ اس سے قبل آئی سی سی بورڈ کی رائے شماری متوقع تھی، جس میں 2024 اور 2027 کے آئی سی سی ایونٹس کے دوران پاکستان کی میزبانی میں ہونے والے تمام ایونٹس میں بھارت کے تمام میچز نیوٹرل مقام پر کھیلے جائیں گے اور اس کے بدلے میں بھارت کی میزبانی میں ہونے والے ایونٹس میں پاکستان سے متعلق تمام میچز بھی نیوٹرل مقام پر کھیلے جائیں گے۔
آئی سی سی کے اعلامیے کے مطابق معاہدے کا اطلاق پاکستان میں 2025 میں ہونے والی مینز چیمپیئنز ٹرافی 2025، بھارت میں ہونے والے ویمنز ون ڈے ورلڈ کپ اور 2026 میں بھارت اور سری لنکا میں ہونے والے مینز ٹی20 ورلڈ کپ پر بھی ہوگا۔ آئی سی سی نے اس کے بدلے پاکستان کو 2028 کے ورلڈ کپ کی میزبانی سونپ دی ہے تاکہ پاکستان کرکٹ بورڈ کو ہونے والے مالی نقصان کا ازالہ ہو سکے۔
