وزیراعظم پاکستان شہباز شریف نے مولانا فضل الرحمان سے رابطہ کیا ہے، اور مدارس رجسٹریشن بل کے معاملے پر کل انہیں ملاقات کے لیے بلا لیا ہے۔
میڈیا رپورٹس کے مطابق مولانا فضل الرحمان کل سہہ پہر 3 بجے وزیراعظم ہاؤس میں شہباز شریف سے میٹنگ کریں گے، اور اتحاد تنظیمات مدارس کا مؤقف سامنے رکھیں گے۔
یہ بھی پڑھیں مدارس رجسٹریشن بل پر صدر مملکت آصف علی زرداری کے اعتراضات کیا ہیں؟
میڈیا رپورٹس کے مطابق مولانا فضل الرحمان نے وزیراعظم کی جانب سے رابطہ کرنے کے بعد ممتاز عالم دین مفتی تقی عثمانی سے بھی رابطہ کیا ہے۔
میڈیا رپورٹس میں کہا گیا ہے کہ مولانا فضل الرحمان نے مفتی تقی عثمانی کو اعتماد میں لیا، اور کل ہونے والی ملاقات سے متعلق مشاورت بھی کی۔
دوسری جانب جے یو آئی کے سینیٹر کامران مرتضیٰ نے کہا ہے کہ کل وزیراعظم سے مولانا فضل الرحمان کی ملاقات ہوگی، ہم شہباز شریف سے اچھے کی امید رکھتے ہیں۔
یاد رہے کہ صدر مملکت آصف علی زرداری نے مدارس رجسٹریشن بل پر اعتراضات عائد کیے ہیں جس کے بعد مولانا فضل الرحمان نے احتجاج کی دھمکی دی ہے۔
یہ بھی پڑھیں مدارس رجسٹریشن ترمیمی بل ایکٹ بن چکا، کوئی ترامیم قبول نہیں کریں گے، مولانا فضل الرحمان
مولانا فضل الرحمان سمیت اتحاد تنظیمات مدارس کا مؤقف ہے کہ صدر نے بل پر بروقت اعتراضات عائد نہیں کیے جس کے باعث وہ ایکٹ بن چکا ہے، اس لیے اس کا گزٹ نوٹیفکیشن جاری کیا جائے۔
