پاکستانی اداکار فیروز خان اور ان کی دوسری اہلیہ زینب کے درمیان علیحدگی کی خبروں پر ان کی بہن اور اداکارہ حمائمہ ملک نے سچ بتا دیا۔
سوشل میڈیا پر زیرِگردش دعوؤں کے مطابق زینب کے انسٹاگرام اکاؤنٹ سے ایک مبہم اسٹوری اپڈیٹ ہوئی جسے دیکھ کر صارفین کشمکش میں مبتلا ہوگئے، اگرچہ کہ چند ہی لمحوں بعد یہ اسٹوری حذف کردی گئی تھی لیکن سوشل میڈیا پر وائرل اسکرین شارٹ میں زینب کے فیروز سے علیحدگی کے اعلان نے تہلکہ مچا دیا۔
تاہم حمائمہ ملک نے انسٹاگرام پر اسٹوری اپڈیٹ کرتے ہوئے جھوٹی خبریں پھیلانے والوں کو خبردار کیا اور لکھا کہ ’اوہ اللہ کے بندو! وہ ابھی ابھی جاگنگ کرنے گئے ہیں، ہاہاہا، اور سلطان اور فاطمہ میرے ساتھ بیٹھ کر فلم دیکھ رہے ہیں۔‘
حمائمہ نے مزید لکھا کہ ’اللہ سے ڈرو لوگوں! فیروز سے آگے جہاں اور بھی ہیں۔ بار بار کبھی طلاق، کبھی شادی، کبھی افیئر کی باتیں۔ کچھ اور لطف اندوز ہونے کے لیے ڈھونڈو، براہ کرم یہ ہمارا خاندان ہے، اور ہم سب ایک ساتھ خوش اور صحت مند رہتے ہیں۔‘
ایک اور اسٹوری میں حمائمہ نے فیروز اور زینب کے خوشگوار لمحات پر مشتمل ویڈیو شیئر کی جس میں فیروز اہلیہ کو ’مائے بیبی‘ کہہ کر پکار رہے ہیں۔ ویڈیو کے کیپشن میں حمائمہ نے لکھا کہ ’یہ تم نفرت کرنے والوں کو دکھانے کے لیے نہیں بلکہ یہ تمہیں سکون سے محبت کرنا سکھانے کے لیے ہے۔‘
یاد رہے کہ فیروز خان کی پہلی شادی 2018 میں علیزا سلطان سے ہوئی تھی، اداکار کے ہاں پہلے بچے کی پیدائش 2019 جبکہ بیٹی کی پیدائش 2022 میں ہوئی تھی۔ بعدازاں 2022 میں ہی فیروز اور علیزا کے درمیان طلاق ہو گئی تھی، علیزا نے الزام عائد کیا تھا کہ فیروز خان انہیں تشدد کا نشانہ بناتے ہیں۔
جون 2024 میں اداکار فیروز خان نے ماہر نفسیات ڈاکٹر زینب سے شادی کی تھی جس کے بعد سے یہ جوڑا خوشگوار ازدواجی زندگی گزار رہا ہے اور اکثر اپنی تصاویر شیئر کرتا ہے۔
