عسکری قیادت نے اس عزم کا اظہارکیا ہے کہ وہ عوام کی حمایت سے اپنی آئینی ذمے داریاں نبھائے گی۔ آرمی چیف جنرل سید عاصم منیر کی زیر صدارت کور کمانڈرز کانفرنس میں کہا گیا ہے کہ چیلنجز سے پوری طرح آگاہ ہیں۔ اندرونی و بیرونی خطرات کا منہ توڑ جواب دیا جائے گا۔ فورم نے قومی سلامتی کمیٹی کے طے کردہ اہداف پر عمل کی یقین دہانی بھی کرائی۔
خطرہ اندرونی یا بیرونی، مسلح افواج خطرات سے نمٹنے کے لیے ہمہ وقت تیار ہیں۔ اس عزم کا اظہار آرمی چیف جنرل سید عاصم منیر کی زیرصدارت کور کمانڈرز کی 257 ویں کانفرنس میں کیا گیا۔
آئی ایس پی آر کے اعلامیے کے مطابق کور کمانڈرز کانفرنس میں ملکی داخلی اور سلامتی کی صورتحال پر غور اور درپیش چیلنجز پر تبادلہ خیال کیا گیا۔ فورم نے دہشتگردی کی باقیات کے خلاف جاری آپریشنز پر اطمینان کا اظہار کرتے ہوئے کہا کہ عسکری قیادت چیلنجز سے پوری طرح آگاہ ہے۔ پاک فوج عوام کی حمایت سے اپنی آئینی ذمے داریاں نبھائے گی۔
اعلامیے میں کہا گیا ہے کہ فورسز مغربی سرحدی علاقوں میں انٹیلی جنس کی بنیاد پر کارروائیاں کر رہی ہیں۔ دہشتگردی کی لعنت کے طویل مدتی بنیادوں پر خاتمے کے لیے قوم اور حکومت کو مشترکہ روش اپنا ہوگی۔
آئی ایس پی آر کے مطابق فورم نے یقین دلایا کہ قومی سلامتی کمیٹی کے طے کردہ اہداف پر عمل کیا جائے گا۔ دہشت گردی کی لعنت کے خلاف تمام فریقین کے ساتھ ملکر مربوط اقدامات کئے جائیں گے۔
