صدر مملکت آصف علی زرداری نے مدارس رجسٹریشن بل پر دستخط کردیے ہیں، جس کے بعد جمعیت علما اسلام (ف) کا ردعمل سامنے آگیا ہے۔
ترجمان جمعیت علما اسلام اسلم غوری نے کہاکہ مدارس رجسٹریشن ایکٹ کا نوٹیفکیشن جاری ہونے پر اللہ کریم کے حضور سجدہ شکر کرتے ہیں۔
یہ بھی پڑھیں فضل الرحمان کا دباؤ کارگر، صدر مملکت نے مدارس رجسٹریشن بل پر دستخط کردیے
انہوں نے کہاکہ قوم، کارکنان اور اتحاد تنظیمات مدارس کے اکابر کو مبارکباد پیش کرتے ہیں، اللہ کریم نے سرخرو کیا۔
ترجمان نے کہاکہ ہماری جدوجہد رنگ لے آئی، جے یو آئی دینی مدارس کے تحفظ میں ہمیشہ کردار ادا کرتی رہے گی۔
انہوں نے کہاکہ مدارس دینیہ اسلام کے قلعے اور پاکستان کے نظریاتی جغرافیے کے محافظ ہیں، دینی اداروں کے تحفظ کے لیے علما کا اتحاد اہم ہے۔
انہوں نے کہاکہ مدارس کے خلاف ہر سازش ناکام بنائیں گے، مدارس کی خود مختاری پر کوئی کمپرومائز نہیں کیا جائےگا۔
واضح رہے کہ اس سے قبل صدر مملکت آصف علی زرداری نے مدارس رجسٹریشن بل پر اعتراضات عائد کردیے تھے، جس کے بعد مولانا فضل الرحمان نے احتجاج کی دھمکی دی تھی۔
اب صدر مملکت آصف علی زرداری نے مدارس رجسٹریشن ایکٹ پر دستخط کے ساتھ ہی سوسائٹیز رجسڑیشن ایکٹ 2024 میں ترمیم کا آرڈیننس بھی جاری کردیا۔
یہ بھی پڑھیں مولانا فضل الرحمان کی ایک اور کامیابی، مدارس رجسٹریشن آرڈیننس جاری کرنے کی منظوری
ترمیمی آرڈیننس جاری ہونے کے بعد اب قانون کے تحت دینی مدارس کی رجسٹریشن سوسائٹی ایکٹ کے مطابق ہوگی۔
