سرگودھا کے شہری نے پاکستان کرکٹ ٹیم کے سابق کپتان انضمام الحق کا بیٹ 4 لاکھ روپے میں خرید کر معروف امدادی تنظیم ’ الخدمت فاؤنڈیشن‘ کے حوالے کردیا۔
واضح رہے کہ انضام الحق کے بیٹ پر آسٹریلیا اور ورلڈ الیون کے لیجنڈری کرکٹرز کے اوریجنل دستخط بھی ثبت ہیں۔
الخدمت فاؤنڈیشن کے ترجمان شعیب ہاشمی کے مطابق کرکٹ بیٹ سرگودھا کے بزرگ شہری عامر محمود چیمہ نے الخدمت فاؤنڈیشن کی ڈونر کانفرنس منعقدہ مئی 2017 میں شریک ہو کر 4 لاکھ روپے میں خریدا تھا۔ جبکہ انضمام الحق نے اس کرکٹ بیٹ کی نیلامی سے حاصل ہونے والی خطیر رقم الخدمت فاؤنڈیشن کے ’ کفالت یتامی پروگرام‘ کو عطیہ کی تھی۔
گزشتہ روز عامر محمود چیمہ انضمام الحق سے خریدا ہوا بیٹ لے کر الخدمت فاؤنڈیشن کے دفتر پہنچ گئے، جہاں انھوں نے بیٹ الخدمت کے عہدیداران کے حوالے کردیا کہ وہ اسے ایک بار پھر نیلام کرکے رقم مستحقین پر خرچ کریں۔
