وزیراعظم شہباز شریف نے کہا ہے کہ دشمن مذموم مقاصد کے لیے گھات لگائے بیٹھا ہے، سرحد پار سے حملے کا بھرپور جواب دیا جائے گا۔
وزیراعظم شہباز شریف کے زیرصدارت اسلام آباد میں نیشنل ایکشن پلان پر عملدرآمد سے متعلق ایپکس کمیٹی کا اجلاس منعقد ہوا۔ اس موقع پر شرکا سے خطاب کرتے ہوئے وزیراعظم نے کہا سب کو مبارکباد پیش کرتا ہوں کہ پاکستان نے سلامتی کونسل کے غیرمستقل رکن کے طور پر ذمہ داری سنبھالی ہے۔
یہ بھی پڑھیں: معاشی ترقی کے لیے دہشتگردی کے ناسور کو جڑ سے اکھاڑ پھینکنا ناگزیر ہو چکا، وزیر اعظم شہباز شریف
انہوں نے کہا کہ پاکستان سلامتی کونسل میں اپنا بھرپور کردار ادا کرے گا، نائب وزیراعظم و وزیر خارجہ اسحاق ڈار نے پاکستان کے سلامتی کونسل میں انتخاب کے لیے بھرپور کوشش کی۔
وزیراعظم نے کہا کہ دشمن گھات لگائے بیٹھا ہے، سرحد پار سے حملے کا بھرپور جواب دیا جائے گا، فتنہ الخوارج کا مکمل خاتمہ کرنے کا وقت آگیا ہے، دہشتگردوں کے گھس بیٹھیے یہاں موجود ہیں، اتفاق اور اتحاد سے ملک سے دہشتگردی کا خاتمہ کریں گے۔
یہ بھی پڑھیں: فتنہ الخوارج اور سہولت کاروں کے خاتمے تک ان کا پیچھا کریں گے، آرمی چیف جنرل عاصم منیر
شہباز شریف نے کہا کہ خیبرپختونخوا اور بلوچستان میں پاکستان مخالف سازشیں ہورہی ہیں، ہمیں بخوبی علم ہے کہ بلوچستان میں پاکستان کے خلاف بُنی جانے والی سازشوں میں کون کون سے ممالک سپورٹ کررہے ہیں، صوبے آرمی کے ساتھ مل مربوط نظام بنائیں، وزیر داخلہ سے گزارش کی گئی تھی کہ صوبوں کے ساتھ مل کر پلان بنائیں، پولیس کی ٹریننگ اور ٹیکنالوجی سمیت تمام معاملات اہم ہیں، دشمن کے مذموم مقاصد ناکام بنانے کے لیے پولیس کی استعداد کار میں اضافہ کیا جارہا ہے، دہشتگردی کے خلاف جنگ میں ہمیں جدید ٹیکنالوجی سے استفادہ کرنا ہوگا۔
انہوں نے کہا کہ ذاتی پسند اور ناپسند نہیں بلکہ پاکستان کا مفاد پہلی ترجیح ہونا چاہیے، ڈیجیٹل محاذ پر پاکستان کے خلاف زہر اگلا جارہا ہے، بیرون ملک بیٹھے عناصر پاکستان کے خلاف پروپیگنڈا کررہے ہیں، پاکستان کی سیکیورٹی ہماری ترجیح ہے، سرحد پار سے کارروائیوں کا منہ توڑ جواب دیا جائے گا۔
یہ بھی پڑھیں: بلوچستان میں 2024 بدترین سال، دہشتگردی میں 17.84فیصد اضافہ
وزیراعظم نے کہا کہ اسلام آباد پر جو یلغار ہوئی، سوشل میڈیا نے اس پر جھوٹ کا طوفان کھڑا کیا، رینجرز کے جوانوں کے بارے میں جھوٹی خبریں بنائی گئیں، جوقربانیاں دے رہے ہیں وہ بھی ماؤں کے سپوت ہیں، دوست نما دشمن پاکستان کے خلاف مہم چلا رہے ہیں اور جھوٹ کو سپورٹ اور حقائق کو مسخ کررہے ہیں، اس پروپیگنڈے کو کاؤنٹر نہ کیا گیا تو ساری کوششیں دریا برد ہوجائیں گی۔
