صوبہ خیبر پختونخوا کے دارلحکومت پشاور کے علاقے تہکال میں 2 گرو ہوں کے درمیان فائرنگ کے نتیجے میں 5 افراد جاں بحق اور 6 زخمی ہوگئے۔
یہ بھی پڑھیں:پشاور: فائرنگ کے مختلف واقعات میں 13 افراد ہلاک
سینئر سپرنٹنڈنٹ آف پولیس (ایس ایس پی) آپریشنز کاشف ذوالفقار نے میڈیا کو بتایا کہ یہ واقعہ 2 فریقین کے درمیان فائرنگ کے تبادلے کے دوران پیش آیا، بقول ان کے یہ واقعہ ذاتی دشمنی کا نتیجہ ہے تاہم پولیس اس کی تحقیقات کر رہی ہے۔
ایس ایس پی نے بتایا کہ پولیس کی بھاری نفری موقع پر پہنچ گئی ہے اور فرار ہونے والے مشتبہ افراد کی تلاش جاری ہے۔
ورسک کے سپرنٹنڈنٹ آف پولیس مختیار خان نے بتایا کہ ایک پارٹی کے لوگ ایک شادی کی تقریب سے واپس آرہے تھے جب ان کا سامنا ایک پل کے قریب موجود دوسری پارٹی سے ہوا۔ اس کے بعد دونوں گروپوں کے درمیان فائرنگ کا تبادلہ ہوا جس میں 5 افراد قتل اور 6 زخمی ہوگئے۔
مزید پڑھیں:پشاور: زمین کے تنازع پر فائرنگ، خواتین اور بچوں سمیت 9 افراد جاں بحق
ایس پی نے بتایا کہ ہماری معلومات کے مطابق ان کے درمیان ماضی سے تنازع چلا آ رہا تھا اور جائیداد کے تنازع پر ماضی کے قتل کو لے کر فریقین کے درمیان ذاتی دشمنی تھی‘۔ انہوں نے مزید کہا کہ پولیس اس بات کا تعین کر رہی ہے کہ دونوں طرف سے کتنے لوگوں کو نشانہ بنایا گیا تھا۔ ابھی تک کوئی گرفتاری عمل میں نہیں لائی گئی ہے۔
واضح رہے کہ گزشتہ ماہ اکیڈمی ٹاؤن کے قریب فائرنگ کے نتیجے میں ایک ہی خاندان کے 3 افراد اور 2 راہگیروں سمیت 5 افراد جاں بحق ہوگئے تھے۔
ادھر مقامی پولیس نے دعویٰ کیا کہ ایک مشتبہ شخص کو گرفتار کرلیا گیا جس کی شناخت صبور کے نام سے ہوئی، جبکہ دیگر حملہ آور موقع سے فرار ہوگئے۔ مبینہ حملہ آور اور متاثرین قریبی رشتہ دار بتائے گئے تھے اور ان کے درمیان خونی جھگڑا تھا۔
یہ بھی پڑھیں:پشاور: فائرنگ کے 2 الگ واقعات میں سرکاری افسر اور پولیس اہلکار جاں بحق
پشتاکھارا پولیس اسٹیشن کے ایک افسر نے بتایا کہ ایک ہی خاندان کے کئی افراد ایک گاڑی میں سفر کر رہے تھے جب ان کے مخالفین نے ان پر حملہ کیا۔
