پانی پی ٹی آئی عمران خان اور ان کی اہلیہ بشریٰ بی بی کے خلاف توشہ خانہ ٹو کیس کی اڈیالہ جیل میں سماعت ہوئی۔
کیس کی سماعت سپیشل جج سینٹرل شاہ رخ ارجمند نے کی جب دوران سماعت بشری بی بی اور ان کے وکلا عدالت میں پیش نہیں ہوئے۔
سماعت کے دوران عمران خان کے وکیل قوسین فیصل مفتی کی طرف سے کیبنٹ ڈویژن کے ڈپٹی ڈائریکٹر کوارڈینیشن محمد احد پر جرح مکمل کی گئی۔
یہ بھی پڑھیے:عمران خان کے خلاف توشہ خانہ 2 کیس میں مزید تحقیقات کی ضرورت، اسلام آباد ہائیکورٹ کا تفصیلی فیصلہ جاری
سماعت کے دوران استغاثہ کے گواہ طلعت کا بیان بھی ریکارڈ کیا گیا۔ ملزمہ بشریٰ بی بی اور ان کے وکلا کی عدم حاضری پر عدالت نے برہمی کا اظہار کیا۔
اس موقع پر عدالت نے بشریٰ بی بی کے وکلاء کی جانب سے آئندہ سماعت پر گواہ پر جرح مکمل نہ کرنے پر تادیبی کاروائی کی ہدایت کی۔
عدالت نے آئندہ سماعت پر مزید 5 گواہ بیان ریکارڈ کرانے کے لیے طلب کرلیے جن میں محمد شفقت، قیصر، عمر صدیق، محسن اور فہیم شامل ہیں۔
کیس کی سماعت منگل 14 جنوری تک ملتوی کر دی گئی۔
