ڈائریکٹوریٹ جنرل آف امیگریشن اینڈ پاسپورٹس نے اپنی ‘فاسٹ ٹریک’ پاسپورٹ سہولت میں بڑی توسیع کا اعلان کیا ہے، اس سروس کا مقصد تیز رفتار پاسپورٹ پروسیسنگ خدمات تک عوام کی رسائی کو بہتر بنانا ہے۔
ابتدائی طور پر صرف 7 بڑے شہروں اسلام آباد، کراچی، لاہور، پشاور اور کوئٹہ میں پیش کی جانے والی اس سروس کو اب ملک بھر میں 47 مقامات تک بڑھا دیا گیا ہے۔
یہ بھی پڑھیں:پاکستان میں اب پاسپورٹ کتنے دنوں میں مل جایا کرے گا؟
تازہ ترین توسیع نے فاسٹ ٹریک سروس نیٹ ورک میں 26 نئے شہروں کو شامل کیا ہے ، جس سے مجموعی تعداد 47 ہوگئی ہے۔
نئے شامل شہروں میں اٹک، ہری پور، چکوال، بٹ خیلہ، سرگودھا، صوابی، بھلوال، نوشہرہ، حافظ آباد، کرک، میانوالی، مانسہرہ، بھکر، مظفر آباد، کوہاٹ، میرپور (آزاد جموں کشمیر)، ڈی آئی خان، باغ آزاد کشمیر، سوات، راولاکوٹ، ایبٹ آباد، کوٹلی، بنوں، سدھنوتی، ہنگو اور بھمبر شامل ہیں۔
یہ توسیع ان علاقوں میں شہریوں کے لیے پاسپورٹ کی درخواست کے عمل کو تیز تر اور زیادہ قابل رسائی بنانے کی جاری کوششوں کا حصہ ہے۔
مزید پڑھیں:پاسپورٹ کے اجرا میں تاخیر، 5 لاکھ سے زائد درخواست دہندگان متاثر
ڈائریکٹوریٹ جنرل نے زونل سربراہوں کو ہدایت کی ہے کہ وہ اس بات کو یقینی بنائیں کہ نئے شامل مقامات بغیر کسی تاخیر کے فاسٹ ٹریک خدمات پیش کرنا شروع کردیں۔
مزید برآں ڈائریکٹر (ڈیٹا بیس) کو پاسپورٹ پروسیسنگ سسٹم (پی پی ایس) کو اپ ڈیٹ کرنے کا کام سونپا گیا ہے تاکہ ان تبدیلیوں کی عکاسی کی جاسکے اور نئے شہروں کو فاسٹ ٹریک زمرے میں شامل کیا جاسکے۔
اسسٹنٹ ڈائریکٹر (پالیسی ون) حافظ عبدالناصر کی جانب سے جاری کردہ نوٹیفکیشن کو ڈائریکٹر جنرل آف پاکستان پوسٹ سمیت تمام متعلقہ حکام کو ارسال کر دیا گیا ہے تاکہ توسیع شدہ سروس کے مناسب نفاذ اور وسیع پیمانے پر آگاہی کو یقینی بنایا جا سکے۔
یہ بھی پڑھیں:اب پاسپورٹ حاصل کرنے کے لیے مہینوں انتظار نہیں کرنا پڑے گا، بڑی خوشخبری آگئی
اس اقدام کے ساتھ ، ڈائریکٹوریٹ جنرل کا مقصد زیادہ مؤثر پاسپورٹ پروسیسنگ فراہم کرنا ہے، جس سے نئے شامل ہونے والے شہروں میں درخواست دہندگان کے لیے انتظار کے اوقات میں نمایاں کمی واقع ہوگی۔
