لڑکی کا ایک شخص کو ’کراہت آمیز‘ نظر آنے پر ریپ کا الزام لگاکر جیل پہنچانے کا اعتراف

بدھ 22 جنوری 2025
icon-facebook icon-twitter icon-whatsapp

امریکی ریاست پینسیلوینیا میں ایک لڑکی نے اعتراف کیا ہے کہ اس نے ایک اجنبی اور بے قصور شخص کو محض اس لیے ریپ کا الزام لگا کر جیل پہنچا دیا کیوں کہ وہ اسے ’کراہت آمیز‘ لگا تھا۔

20 سالہ انجیلا اوروموا نے الزام عائد کیا تھا کہ اسے ایک سپر مارکیٹ کے باہر ڈینیئل پرسن نامی شخص نے جنسی زیادتی کا نشانہ بنایا تاہم یہ الزام جھوٹا ثابت ہونے پر اب خود لڑکی کو17 سال قید کی سزا سنائی گئی ہے۔

یہ بھی پڑھیے:ڈونلڈ ٹرمپ کی ایک اور فتح، جھوٹا الزام عائد کرنیوالے چینل پر 15 ملین ڈالر ہرجانہ

اس الزام کے بعد مقامی پولیس نے ڈینیئل پِرسن کو گرفتار کرکے تحقیقات کا آغاز کیا تھا۔ تاہم مبینہ وقوعے کی سی سی ٹی وی فوٹیجز اور الزام لگانے والی لڑکی کا فون ڈیٹا جانچنے کے بعد پولیس کو لڑکی کے دیے گئے بیان اور دستیاب شواہد میں متعدد تضادات نظر آئے۔

بعدازاں، پولیس کی پوچھ گچھ پر لڑکی نے اعتراف کیا کہ اس نے مذکورہ شخص کو ایک ہی بار مارکیٹ کے قریب دیکھا تھا اور اس پر جھوٹے الزامات لگائے۔ ان الزامات کی وجہ اس نے یہ بتائی کہ اس شخص کو دیکھ کر اسے جھرجھری آئی اور وہ انہیں کراہت آمیز لگا۔

اس اعتراف پر پولیس نے لڑکی کے خلاف جھوٹے الزامات لگانے کا مقدمہ درج کرکے کارروائی کا آغاز کیا اور عدالت نے لڑکی کو 17 سال قید کی سزا سنائی ہے جبکہ بے قصور شخص کو 31 دن جیل میں گزارنے کے بعد رہا کردیا گیا ہے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں

icon-facebook icon-twitter icon-whatsapp