سینیٹر طلحہ محمود کو وفاقی وزیر برائے مذہبی امور کا قلمدان بھی دینے کا نوٹیفکیشن جاری کر دیا گیا ہے۔
سینیٹر طلحہ محمود کو وزارت مذہبی امور کی اضافی ذمہ داریاں دی گئی ہیں، اس سے قبل وہ وزیرسیفران کے فرائض بھی انجام دے رہے تھے۔
نئی ذمہ داریاں سنبھالنے کے بعد وزیر مذہبی امور سنیٹر طلحہ محمود نے سعودی سفیر نواف سعید المالکی سے ملاقات کی، ملاقات میں سرکاری عازمین حج کی سہولت کے لیے ’روڈ ٹو مکہ پراجیکٹ‘ کی دیگر شہروں تک توسیع سے متعلق تبادلہ خیال کیا گیا۔
سینیٹر طلحہ محمود کا کہنا ہے ’سعودی سفیر نواف سعید المالکی سے میرے قریبی تعلقات ہیں، نواف سعید المالکی نے دونوں ملکوں کے عوام کو قریب لانے میں کلیدی کردار ادا کیا۔ انہوں نے کہا کہ مفتی عبدالشکور مرحوم کے مشن کے تحت پاکستانیوں کو بہترین سہولیات دینا میری اولین ترجیح ہے۔‘
سعودی سفیر نواف سعید المالکی نے اس موقع پر گفتگو میں کہا کہ ’روڈ ٹو مکہ پراجیکٹ کے لیے سعودی اہلکاروں کو مخصوص ایئرپورٹ ٹرمینل 25 اپریل کو حوالے کیا جائے گا، نئے وزیر مذہبی امور سنیٹر محمد طلحہ محمود سعودی عرب کے دیرینہ اور بھروسہ مند دوست ہیں،ان کے عہدہ سنبھالنے سے تعلقات اور تعاون میں ایک نیا دور شروع ہو گا۔‘
‘نواف سعید المالکی نے کہا کہ’سعودی عرب کی حکومت فریضہ حج کی ادائیگی میں اپنے برادر اسلامی ملک پاکستان کے ساتھ ہر ممکن تعاون کرے گی۔
سعودی سفیر نے وزیر مذہبی امور کا عہدہ سنبھالنے پر سنیٹر محمد طلحہ محمود کو مبارک باد پیش کی اور ان کے لیے نیک خواہشات کا اظہارکیا۔ اورانہیں ہرممکن تعاون کی یقین دہانی کروائی۔
واضح رہے کہ سابق وفاقی وزیر برائے مذہبی امور مفتی عبدالشکور گزشتہ دنوں اسلام آباد میں ایک ٹریفک حادثے میں جاں بحق ہو گئے تھے۔
