پاکستان مکسڈ مارشل آرٹس فیڈریشن (پی ایم ایم اے ایف) نے اعلان کیا ہے کہ پاکستانی کراٹے فائٹر شاہ زیب رند نے میامی میں کراٹے کمبیٹ (کے سی) 52 ایونٹ میں 3 مرتبہ چیمپیئن بننے والے ایڈگرس اسکریورز کو 0 ۔7 سے شکست دے کر اپنے لائٹ ویٹ ٹائٹل کا کامیابی سے دفاع کیا۔
کے سی 52 عالمی کراٹے ایم ایم اے سیریز کا حصہ ہے جس کے مقابلوں میں دُنیا بھر سے فائٹر حصہ لیتے ہیں۔
جنوب مغربی صوبہ بلوچستان سے تعلق رکھنے والے رند نے 2011 میں صوبائی سطح کے مقابلے میں کامیابی حاصل کرنے کے بعد اپنا پہلا مارشل آرٹس ٹائٹل جیتا تھا۔
انہوں نے پہلا قومی ٹائٹل 2019 میں جیتا تھا جب انہوں نے شمال مغربی صوبہ خیبر پختونخوا میں نیشنل گیمز میں کامیابی حاصل کی تھی۔
Heartfelt congratulations to MMA fighter Shahzaib Rind, the brave son of 🇵🇰 who hails from Balochistan, on defending his lightweight title in Miami, Florida, USA & becoming the world champion for second time. Shahzaib Rind dedicated his victory to the people of Pakistan. pic.twitter.com/Q2PovD1ZHC
— Pakistan Consulate General New York (@PakinNewYork) January 27, 2025
اپنے ناقابل شکست کراٹے فائٹنگ کیریئر کے اڑھائی سالوں کے دوران شاہ زیب رند نے شمالی امریکا، پیرو، وینزویلا، برازیل، فرانس اور بھارت کے فائٹرز کا مقابلہ کیا ہے۔
پی ایم ایم اے ایف کی جانب سے جاری بیان میں کہا گیا ہے کہ رند نے مہارت اور عزم کا شاندار مظاہرہ کرتے ہوئے ایڈگرس اسکریورز کو سخت مقابلے میں شکست دے کر دوسرا چیمپیئن شپ ٹائٹل اپنے نام کیا ہے۔
بیان میں کہا گیا ہے کہ شاہ زیب رند نے ‘غیر معمولی’ کارکردگی کا مظاہرہ کیا جس نے پورے میچ کے دوران شائقین کو پرجوش رکھا، ان کی ’لگن، انتھک تربیت اور غیر معمولی مہارت‘ نے انہیں زبردست کامیابی دلائی۔
نیو یارک میں پاکستانی سفارت خانے نے رند کو اپنے ٹائٹل کا دفاع کرنے پر مبارکباد دی۔
رند کا ووشو اور کک باکسنگ کا مشترکہ ریکارڈ 75-4 ہے، جس میں سے زیادہ تر یوٹیوب ویڈیوز دیکھ کر تربیت کے دوران حاصل کیا۔ وہ فی الحال عاصم زیدی کے ماتحت میامی کے مشہور گوٹ شیڈ جم میں تربیت حاصل کر رہے ہیں۔
زیدی کراٹے کمبیٹ کے صدر ہیں، جو اپریل 2018 سے دنیا بھر میں ایونٹس کی میزبانی کرتے ہوئے پہلی پیشہ ورانہ مکمل رابطے والی کراٹے لیگ کو فروغ دیتا ہے۔
