سابق وزیر اعظم عمران خان اور ان کی اہلیہ بشریٰ بی بی نے ایڈیشنل جج جسٹس انعام امین کی جانب سے توشہ خانہ ٹو کیس میں بریت کی درخواست کی سماعت پر ایک مرتبہ پھراعتراض دائر کیا ہے۔
بانی پاکستان تحریک انصاف اور بشریٰ بی بی کے توشہ خانہ کیس میں بریت کی درخواستوں پر سماعت اسلام آباد ہائیکورٹ کے جسٹس راجہ انعام امین منہاس نے کی ۔
یہ بھی پڑھیں:توشہ خانہ ٹو کیس: عمران خان کو ملنے والے 108 تحائف کی فہرست عدالت میں پیش
عمران خان اور بشریٰ بی بی کے وکیل سلمان صفدر نے توشہ خانہ ٹو کیس کسی دوسرے بینچ کو منتقل کرنے کی استدعا کرتے ہوئے کہا کہ انہوں نے اپنے موکل کی ہدایت کے مطابق عدالت کے سامنے اپنی استدعا رکھی ہے۔
سلمان صفدر کے مطابق اس کیس کو اس ہائیکورٹ کے بہت سینیئر جج پہلے ہی سُن چکے ہیں، عمران خان کی ہدایات ہیں کہ وہ اس بینچ کے سامنے کوئی دلائل نہیں دیں لہذا وہ اپنے موکل کی ہدایت کے پابند ہیں۔
مزید پڑھیں:توشہ خانہ ٹو کیس: بشریٰ بی بی کے وارنٹ گرفتاری جاری
سلمان صفدر کا موقف تھا کہ خاور مانیکا نے عمران خان کی عِدت کیس میں بریت کے خلاف اپیل دائر کی تھی، جس میں انہی بنیادوں پر کیس دوسرے بینچ کو منتقل کرنے کا حکم نامہ جاری ہوگیا تھا۔
ایک موقع پر سلمان صفدر نے عدالت کو بتایا کہ ان کے پاس تحریری طور پر اعتراض کی درخواست موجود ہے لیکن وہ دائر نہیں کرنا چاہتے، طویل مکالمے کے باوجود جسٹس انعام امین کیس دوسرے بینچ کو منتقل کرنے پر مطمئن نہ ہوئے۔
مزید پڑھیں: ایف آئی اے نے توشہ خانہ 2 ریفرنس میں بشریٰ بی بی کی ضمانت کا فیصلہ سپریم کورٹ میں چیلنج کردیا
اس موقع پر بیرسٹر سلمان صفدر نے کہا ہے کہ آپ اگلی تاریخ دینے سے قبل آرام سے اس نکتے پر غور کرلیں، جس پر جسٹس راجہ انعام امین منہاس نے سماعت ملتوی کردی۔
