لاس اینجلس آگ نے پاکستانی فلم ’دی مارشل آرٹسٹ‘ کی ریلیز روک دی

جمعہ 31 جنوری 2025
icon-facebook icon-twitter icon-whatsapp

امریکی شہر لاس اینجلس میں بڑے پیمانے پر لگی آگ نے پاکستانی فلم ’دی مارشل آرٹسٹ‘ کی ریلیز بھی روک دی ہے۔

ڈرامہ ’یقین کا سفر‘ اور ’پروازِ جنون‘ میں اپنی اداکاری سے بڑے پیمانے پر مقبولیت حاصل کرنے والے اداکار شاز خان کی پہلی انٹرنیشنل فلم ’دی مارشل آرٹسٹ‘ کی ریلیز ملتوی کردی گئی ہے۔

یہ بھی پڑھیں: رنگ فلم فیسٹیول، امریکا میں پاکستانی فلم میکرز کا عالمی ایوارڈ میلہ

’دی مارشل آرٹسٹ‘ کی ریلیز 31 جنوری 2025 کو ہونی تھی، فلم میں معاون اداکاروں فاران طاہر، صنم سعید اور بابر پیرزادہ نے اپنے فن کے جوہر دِکھائے ہیں، یہ پہلی بین الاقوامی معیار کی انگریزی فلم ہے جس میں پاکستان کے 4 نمایاں اداکار مرکزی کردار ادا کر رہے ہیں۔

اس کے علاوہ، شاز خان نے مائیکل روز البرٹ کے ساتھ مل کر فلم کی ہدایتکاری بھی کی ہے اور کہانی بھی لکھی ہے، فلم کی عکس بندی امریکا، وسطی امریکا اور میں کی گئی ہے۔

یہ فلم دنیا بھر میں ریلیز کے لیے تیار تھی اور اس کا شاندار پریمیئر لاس اینجلس میں ہونا تھا، تاہم لاس اینجلس میں لگنے والی آگ کے باعث غیر متوقع حالات پیش آئے جس کے نتیجے میں فلم کی ریلیز مؤخر کرنا پڑی۔

یہ بھی پڑھیں: پاکستانی فلم انڈسٹری کا زوال کیوں ہوا، گلیاں اور سڑکیں ویران کر دینے والے ڈرامے آج کیوں نہیں؟

یہ فلم اب لاس اینجلس میں بہار 2025 میں پیش کی جائے گی، بدقسمتی سے پاکستانی شائقین کے لیے فلم کی ریلیز کی تاریخ ابھی طے نہیں ہوئی ہے۔

پروڈیوسرز شائقین کی طرف سے زبردست مانگ کے پیش نظر فلم کو عید پر ریلیز کرنے پر غور کر رہے ہیں اور حتمی تاریخ کا اعلان جلد ہی کر دیا جائے گا،فلم ’مارشل آرٹسٹ‘ کی اردو اور انگریزی دونوں زبانوں میں ڈبنگ کی جائے گی۔

شائقین اس فلم کا بے صبری سے انتظار کررہے ہیں اور ہم امید کرتے ہیں کہ یہ فلم نہ صرف پاکستان بلکہ دنیا بھر میں شاز خان اور دیگر اداکاروں کے کام کو سراہا جائے گا۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں

icon-facebook icon-twitter icon-whatsapp