قلات میں سیکیورٹی فورسز کے ایک آپریشن کے دوران 23 دہشتگردوں کو ہلاک کردیا گیا جبکہ مقابلہ کرتے ہوئے سیکیورٹی فورسز کے 18 جوان شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق بلوچستان کے ضلع قلات کے علاقے منگوچر میں دہشتگروں نے رات گئے معمولات زندگی متاثر کرنے اور کوئٹہ کراچی شاہراہ کو بلاک کرنے کی کوشش کی جس پر سیکیورٹی فورسز نے بروقت کارروائی کرتے ہوئے 23 دہشتگردوں کو ہلاک کردیا۔
یہ بھی پڑھیے:بلوچستان: تحصیل زہری پر مسلح افراد کا حملہ، سرکاری عمارتیں جلا دیں، ریکارڈ بھی قبضے میں لے لیا
ترجمان پاک فوج کے مطابق دہشتگردوں کا مقصد بلوچستان کے پرامن ماحول کو خراب کرنا اور معصوم شہریوں کو نشانہ بنانا تھا، جس پر سکیورٹی فورسز اور قانون نافذ کرنے والے ادارے فوری طور پر حرکت میں آئے۔ فورسز نے دہشتگردوں کے ناپاک عزائم کو ناکام بناتے ہوئے 23 دہشتگردوں کو جہنم واصل کر دیا ۔ اس دوران مقامی آبادی کی حفاظت اور سکیورٹی کو یقینی بنایا گیا۔
آپریشن کے دوران مادرِ وطن کے 18 بہادر سپوتوں نے جرأت و بہادری سے لڑتے ہوئے جامِ شہادت نوش کیا۔ آئی ایس پی آر کے مطابق علاقے میں کلیئرنس آپریشن جاری ہے۔ فورسز پرعزم ہیں کہ اس بزدلانہ کارروائی کے ذمہ داروں، سہولت کاروں اور منصوبہ سازوں کو کیفر کردار تک پہنچایا جائے گا۔
یہ بھی پڑھیے:ڈیرہ اسماعیل خان: فتنہ الخوارج کے دہشتگردوں کا ایف سی چیک پوسٹ پر حملہ، 10 جوان شہید
ترجمان پاک فوج کے مطابق پاکستان کی سکیورٹی فورسز قوم کے شانہ بشانہ بلوچستان کے امن، استحکام اور ترقی کے خلاف ہونے والی ہر سازش کو ناکام بنانے کے لیے سینہ سپر ہیں۔ ہمارے بہادر شہدا کی قربانیاں ہمارے عزم کو مزید مضبوط کرتی ہیں۔
قبل ازیں، اسسٹنٹ کمشنر منگوچر علی گل بلوچ نے وی نیوز سے بات کرتے ہوئے واقعے کی تصدیق کی اور کہا کہ رات گئے مسلح افراد نے قومی شاہراہ کو بلاک کرنے کی کوشش کی اور فائرنگ کی۔ انہوں نے بتایا کہ سیکیورٹی فورسز نے رات بھر دہشتگردوں کا مقابلہ کیا جس کے بعد دہشت گرد فرار ہو گئے۔ اس دوران دہشتگردوں نے نجی بینک میں گرنیڈ پھینکے جس کے نتیجے میں عمارت میں آگ بھڑک اٹھی اور بینک نذر آتش ہو گیا۔
حملے کے بعد علاقے میں کلیئرنس آپریشن مکمل کر لیا گیا ہے جبکہ کوئٹہ کراچی کی قومی شاہراہ کو بھی آمد و رفت کے لیے بحال کر دیا گیا ہے۔
دوسری جانب لیویز حکام کام کا بتانا ہے کہ رات گئے دہشتگردوں نے بسوں پر فائرنگ کے ساتھ ساتھ مختلف سیکیورٹی فورسز کی چوکیوں پر بھی حملے کیے۔ رات بھر منگوچر فائرنگ اور دھماکوں کی زد میں رہا جس سے علاقہ مکین خوف و حراس میں مبتلا رہے۔ حملے میں دہشت گردوں نے بھاری اسلحے کا استعمال کیا جبکہ سیکیورٹی فورسز اور شدت پسندوں میں جھڑپ کا سلسلہ رات بھر جاری رہا۔ سیکورٹی فورسز نے علاقے کو مکمل گھیرے میں لے رکھا ہے۔
قلات میں جوانوں کی شہادت پر صدر مملکت آصف علی زرداری اور وزیراعظم شہباز شریف نے گہرے رنج اور افسوس کا اظہار کرتے ہوئے کہ بروقت کارروائی پر جوانوں کو خراج تحسین پیش کیا ہے۔ انہوں نے کہا کہ پاکستانی قوم امن خراب کرنے والے عناصر کو رد کرتی ہے، حملہ بلوچستان کا امن خراب کرنے کے لیے کیا گیا۔
