کنگ چارلس III نے بکنگھم پیلس سووینیئر پروگرام کے لیے ایک تصویر کا انتخاب کیا ہے جس میں ان کی چھوٹی بہو میگھن مارکل بھی شامل ہیں جس سے ان کی بادشاہ اور رانی کی تاجپوشی کی تقریب میں شرکت کے امکانات روشن پیدا ہوگئے ہیں۔
غیر ملکی میڈیا کے مطابق گزشتہ ہفتے یہ انکشاف ہوا تھا کہ میگھن مارکل اگلے مہینے کنگ چارلس کی تاجپوشی کی تقریب میں شرکت نہیں کریں گی جس سے یہ پتا چلتا تھا کہ شاہی خاندان اور ان کے چھوٹے بیٹے شہزادہ ہیری کی اہلیہ میگھن کے درمیان کشیدگی جاری ہے۔
لیکن اب جب کہ بادشاہ نے بکنگھم پیلس سووینئر پروگرام (جو تاجپوشی کے بارے میں معلومات فراہم کرتا ہے اور جس میں بادشاہ اور ملکہ کی زندگیوں کی دستاویزی تصاویر بھی شامل ہیں) میں اپنے بیٹے ہیری اور بہو میگھن دونوں کی تصایر شامل کی ہیں اس سے اندازہ یہی ہوتا ہے کہ دونوں تاجپوشی میں شریک ہوں گے۔
کنگ چارلس نے سوینیئر کے لیے سنہ 2018 کا ایک خاندانی پورٹریٹ منتخب کیا ہے جس میں چارلس اور دوسری اہلیہ کیمیلا کے ساتھ بڑے بیٹے پرنس ولیم اور ان کی بیوی کیٹ ان کے تین بچوں پرنس جارج، شہزادی شارلٹ، پرنس لوئس، اور پرنس ہیری اور میگھن مارکل شامل ہیں۔
میگھن کے آئندہ تقریب میں شرکت نہ کرنے کے امکان کے پیش نظر بادشاہ کے اس اقدام کو ان کی طرف سے شہزادہ ہیری اور میگھن مارکل دونوں کے لیے صلح کا پیغام سمجھا جا رہا ہے۔
قبل ازیں تاجپوشی کے موقع پر ہیری اور میگھن کی ایک ساتھ شرکت کے بارے میں قیاس آرائیاں کی جارہی تھیں۔ کچھ روز قبل شاہی محل کی جانب سے جاری بیان میں 6 مئی کو ہونے والی رسم تاجپوشی میں صرف شہزادہ ہیری کی شرکت کا تذکرہ تھا جبکہ میگھن کے بارے میں کہا گیا تھا کہ وہ اسی روز اپنے بیٹے آرچی کی چوتھی سالگرہ ہونے کے باعث شریک نہیں ہوسکیں گی۔
اس حوالے سے گارجین نے اپنی ایک رپورٹ میں لکھا تھا کہ ڈیوک آف سسیکس شہزادہ ہیری کی اہلیہ میگھن کی تقریب میں شرکت نہ کرنے کی بظاہر ایک وجہ تو یہ ہے کہ تاجپوشی والے روز ہی ان کے پرنس آرچی کی سالگرہ ہے۔ تاہم اس کی اصل وجہ یہ بھی ہوسکتی ہے کہ دونوں میاں بیوی اور شاہی خاندان کے درمیان تعلقات ہنوز کشیدہ ہیں۔
یاد رہے کہ سسیکس اور محل کے درمیان تعلقات جنوری میں ہیری کی یادداشت اسپیئر کی اشاعت کے بعد سے کشیدہ ہیں جس میں انہوں نے شاہی خاندان اور ادارے کے ارکان پر تنقید کی تھی۔
غیر ملکی میڈیا کے ذرائع کا کہنا ہے کہ بادشاہ چارلس میگھن کی تاجپوشی میں شرکت نہ کرنے پر رنجیدہ تھے اور انہیں افسوس ہے کہ وہ تاریخی موقع پر اپنے چہیتے بیٹے کی بیوی اور اپنے پوتے پوتیوں کو نہیں دیکھ سکیں گے۔
یاد رہے کہ ہیری اور میگھن کو آخری بار شاہی خاندان کے باقی افراد کے ساتھ ستمبر 2022 میں ملکہ ایلزبیتھ کی آخری رسومات کے دوران دیکھا گیا تھا۔ میگھن اور ہیری نے جنوری 2020 میں اعلان کیا تھا کہ وہ شاہی خاندان کے سینیئر فرد کے اعزاز سے سبکدوش ہو جائیں گے۔ وہ اب امریکا میں اپنے دو بچوں کے ساتھ رہتے ہیں۔
