یوکرین کے دارالحکومت کیف میں ہیلی کاپٹر گرنے سے وزیر داخلہ اور نائب وزیر داخلہ سمیت وزارت داخلہ کی اعلیٰ قیادت سمیت 18 افراد ہلاک ہو گئے۔
برطانوی خبر رساں ادارے کے مطابق ہیلی کاپٹر گرنے کا واقعہ کیف کے مضافاتی علاقے برووری میں بچوں کی نرسری کےقریب پیش آیا، ہیلی کاپٹر حادثے میں یوکرین کے وزیر داخلہ، نائب وزیر داخلہ اور سیکرٹری سمیت وزارت داخلہ کی اعلیٰ قیادت ہلاک ہو گئی، اس کے علاوہ حادثے میں بچوں کے اسکول کی عمارت اور دیگر تعمیرات کو بھی نقصان پہنچا۔
یوکرین کے صدارتی دفتر کے نائب سربراہ کا کہنا تھا کہ وزیر داخلہ جنگ زدہ علاقوں کے فضائی دورے پر تھے کہ ہیلی کاپٹر کو حادثہ پیش آیا۔
اس موقع پر ریاست کے اعلیٰ پولیس افسر نے فیس بک پر لکھا کہ گرنے والا ہیلی کاپٹر یوکرین کی ریاستی ایمرجنسی سروس کا تھا۔
میڈیا رپورٹس کے مطابق ہیلی کاپٹر حادثے میں 3 بچے بھی جان کی بازی ہار گئے جبکہ 15 افراد زخمی ہوئے جنہیں اسپتال منتقل کر دیا گیا ہے۔
غیر ملکی میڈیا کے مطابق ہیلی کاپٹر حادثے میں ہلاک ہونے والے وزیر داخلہ ڈینس موناسٹر اسکی صدر ولودومیریزیلنسکی کی کابینہ کے ایک اہم رکن تھے اور انہوں نے فروری 2022 میں یوکرین پر روسی حملے کے بعد سے ہونے والی ہلاکتوں کے بارے میں عوام کو اپ ڈیٹ کرنے میں کلیدی کردار ادا کیا۔
