فوجی عدالتوں میں سویلینز کا ٹرائل: عام شہری کے گھر گھسنا بھی جرم ہے، جسٹس جمال مندوخیل کے ریمارکس

فوجی عدالتوں میں سویلینز کے ٹرائل کے فیصلے کیخلاف انٹراکورٹ اپیلوں پر سماعت جسٹس امین الدین خان کی سربراہی میں سپریم کورٹ کے 7 رکنی آئینی بینچ نے کی۔

فوجی عدالت سے سزایافتہ مجرم کے وکیل سلمان اکرم راجہ نے اپنے دلائل جاری رکھتے ہوئے کہا کہ مرکزی فیصلے میں کہا گیا آرٹیکل 175 کی شق 3 سے باہر عدالتیں قائم نہیں ہو سکتیں۔

یہ بھی پڑھیں: سندھ حکومت نے ملٹری کورٹ میں سویلینز ٹرائل کالعدم قرار دینے کا فیصلہ چیلنج کردیا

جسٹس محمد علی مظہر کا کہنا تھا کہ سروس معاملات میں ابتدائی سماعت محکمانہ کی جاتی ہے، جسٹس حسن اظہر رضوی بولے؛ 9 مئی واقعات کی فوٹیج ٹی وی چینلز پر بھی چلائی گئی، کور کمانڈرز ہاؤسز میں گھس کر توڑ پھوڑ کی گئی۔

جسٹس حسن اظہر رضوی کا کہنا تھا کہ آج کل جلاؤ گھیراؤ اور توڑ پھوڑ کرنا ایک فیشن بن چکا ہے، 9 مئی واقعات میں ایک گھر میں گھس کر ٹی وی اسکرینوں پر ڈنڈے مارے گئے، بنگلہ دیش میں بھی یہی کچھ ہوا، شام میں بھی لوٹ مار کی گئی، یہ کلچر بن چکا ہے۔

جسٹس جمال خان مندوخیل نے ریمارکس دیے کہ کسی عام شہری کے گھر گھسنا بھی جرم ہے، جس پر سلمان اکرم راجہ بولے؛ آرمی آفیسرز پر بھی آرٹیکل 175 کی شق 3 کا اطلاق ہونا چاہیے۔

جسٹس نعیم اختر افغان کا کہنا تھا کہ ملک میں 1973 کا آئین بنا، 18ویں ترمیم میں مارشل لا ادوار کے تمام قوانین کا جائزہ لیا گیا، وہ کام جو پارلیمنٹ کے کرنے کا ہے، وہ سپریم کورٹ سے کیوں کروانا چاہتے ہیں، اگر کوئی ملٹری آفیسر آیا تو اس سوال کا جائزہ لیں گے۔

سلمان اکرم راجہ کو مخاطب کرتے ہوئے جسٹس نعیم اختر افغان بولے؛ آپ کیس کے اختیار سماعت سے باہر نہ نکلیں، بھارت کی مثال دے رہے ہیں وہاں بھی پارلیمنٹ کے ذریعے قانون میں تبدیلی کی گئی ہیں۔

جسٹس حسن اظہر رضوی نے استفسار کیا کہ کیا دنیا میں کبھی کہیں کور کمانڈرز ہاؤسز پر حملے ہوئے، جس پر سلمان اکرم راجہ نے کہا کہ جی ہوئے ہیں، اس کی مثالیں بھی دیں گے۔

دوران سماعت سلمان اکرم راجہ کا لا ریفارمز آرڈیننس کالعدم قرار دینے کے فیصلے کا حوالہ دیا، جس پر جسٹس محمد علی مظہر کا کہنا تھا کہ عدالتی فیصلوں میں جو نشاندہی کی گئی کیا اس پر قانون سازی ہوئی۔

جسٹس جمال خان مندوخیل نے ریمارکس دیے کہ پارلیمنٹ پتا نہیں کن کاموں میں پڑی ہوئی ہے، جو باتیں آپ یہاں کر رہے ہیں وہ پارلیمنٹ کے کرنے کی ہیں، سلمان اکرم راجہ بولے؛ سزا دینے کے عمل میں عدالتی اختیار کو استعمال کیا جانا چاہیے، جس پر جسٹس جمال مندوخیل کا کہنا تھا کہ آپ جتنے بھی فیصلوں کے حوالے دے رہے ہیں، وہ بلوچستان ہائیکورٹ سے ہوئے۔

سلمان اکرم راجہ کا کہنا تھا کہ انہوں نے آئین پاکستان کی پوری تاریخ دیکھی ہے، مارشل لا ادوار میں بلوچستان ہائیکورٹ نے ہمیشہ عام شہریوں کے تحفظ کے لیے فیصلے دیے، جسٹس وقار سیٹھ صاحب نے بھی پشاور ہائیکورٹ سے اہم فیصلہ دیا۔

سلمان اکرم راجہ کے مطابق مرحوم جسٹس وقار سیٹھ صاحب کے فیصلے کا حوالہ عالمی عدالت انصاف میں بھی دیا گیا، ان کے فیصلے کو سپریم کورٹ نے معطل کیا، کوئی عدالت آرٹیکل 175 کی شق 3 کے باہر قائم ہی نہیں جا سکتی۔

جسٹس جمال مندوخیل نے دریافت کیا کہ ملزمان نے ملٹری کورٹس حوالگی کو چیلنج کیوں نہیں کیا، ملزمان کی جانب سے لاپرواہی نہیں برتی گئی، جس پر سلمان اکرم راجہ بولے؛ یہ لاپرواہی نہیں تھی، آپ نے سوال پوچھا تو حقیقت بتاتا ہوں۔

سلمان اکرم راجہ کے مطابق 9 مئی کے ملزمان اور ان کے اہل خانہ کو سخت حالات سے گزرنا پڑا، 10 ملزمان نے ٹرائل چیلنج کرنے کی غرض سے انہیں وکیل کیا تھا لیکن ہائیکورٹ پٹیشن فائل کرنے سے قبل ان کی فیملی کی کال آجاتی اور کہا جاتا کہ پلیز درخواست فائل نہ کریں ہمارا گھر ہی نہیں بچے گا۔

سلمان اکرم راجہ نے عدالت کو بتایا کہ ایک ملزم جنید رزاق نے پٹیشن واپس لینے سے انکار کیا اور آج وہ اسی جنید رزاق کے وکیل ہیں اور اسے سلام پیش کرتے ہیں، جنید رزاق نے ہر طرح کے حالات کا سامنا کیا مگر پٹیشن واپس نہیں لی۔

سلمان اکرم راجہ نے عدالت کو بتایا کہ وہ اپنے موکل پر کتاب لکھیں گے کیونکہ ان کی روداد ایک ہیرو والی کہانی ہے، جسٹس جمال خان مندوخیل کا موقف تھا کہ بنیادی حقوق کی حفاظت عدالت کا کام ہے، تاہم بنیادی حقوق کی خلاف ورزی پر کوئی آئے بھی تو۔

جسٹس محمد علی مظہر کا کہنا تھا کہ کسٹڈی کو غلط مان بھی لیں تو ٹو ون ڈی سے اسکا کیا تعلق، 5 رکنی بینچ کے مرکزی فیصلہ میں کچھ نہیں لکھا گیا، سلمان اکرم راجہ کا موقف تھا کہ جسٹس یحییٰ آفریدی اور جسٹس منیب نے اپنے فیصلے میں تحریر کیا ہے، (1)2ڈی ختم ہوگیا تو سب ختم جاتا ہے۔

جسٹس جمال خان مندو خیل نے استفسار کیا کہ کیا فوجی عدالتوں کو اپنی دائرہ اختیار سے متعلق جائزے کا اختیار ہے، کیا ملٹری کورٹ کا دائرہ اختیار سے متعلق کوئی فیصلہ موجود ہے، جسٹس امین الدین نے بھی ایڈیشنل اٹارنی سے استفسار کیا کسی ملزم نے دوران ٹرائل فوجی عدالت کو چیلنج کیا ہے۔

ایڈیشنل اٹارنی جنرل کا کہنا تھا کہ وہ عدالت کو تفصیلات حاصل کرکے آگاہ کریں گے، ملٹری کورٹس کیس کی سماعت کل تک ملتوی کردی گئی ہے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں