امریکا میں حکومتی کارکردگی کے محکمہ کے سربراہ ایلون مسک کے ملکیتی سوشل میڈیا پلیٹ فارم ایکس پر ٹیسلا کے ایک سرمایہ کار نے نشاندہی کی ہے کہ ٹیک بلینائر کی آٹو کمپنی ٹیسلا نے بکتر بند گاڑیوں کی فراہمی کے ضمن میں 400 ملین ڈالر کا سرکاری معاہدہ اپنے نام کرلیا ہے۔
امریکی میڈیا رپورٹس کے مطابق امریکی محکمہ خارجہ کی جانب سے ایلون مسک کی کمپنی ٹیسلا کو 400 ملین ڈالرز کا کنٹریکٹ دینے والا ہے، ٹیسلا کے سرمایہ کار کے مطابق 5 سالہ کنٹریکٹ ایوارڈ کی متوقع تاریخ رواں برس 30 ستمبر ہے۔
یہ بھی پڑھیں: آٹو پائلٹ موڈ کی خرابی، 20 لاکھ گاڑیاں واپس منگوانے پر ٹیسلا کے خلاف تحقیقات کا آغاز
اپنے ایکس پروفائل پر ٹیسلا کے سرمایہ کار ہونے کے دعویدار سائر میرٹ نے انکشاف کیا کہ امریکی حکومت فی الحال ٹیسلا کو بکتر بند گاڑیاں خریدنے کے لیے 400 ملین ڈالر کا معاہدہ دینے کا منصوبہ بنا رہی ہے۔
سائر میرٹ کے مطابق محکمہ خارجہ کی سب سے حالیہ خریداری کی پیش گوئی جسے دسمبر 2024 میں اپ ڈیٹ کیا گیا تھا، ٹیسلا کو سب سے بڑے متوقع معاہدے کے وصول کنندہ کے طور پر نامزد کیا گیا ہے۔
مزید پڑھیں: جرمنی: ٹیسلا فیکٹری میں آتشزدگی، ایلون مسک کا دورہ اور ملازمین کے لیے ’آئی لو یو‘ کا پیغام
ایلون مسک کی آٹو کمپنی ٹیسلا امریکی محکمہ خارجہ سے 400 ملین ڈالر کا معاہدہ حاصل کرنے کے لیے تیار دکھائی دیتی ہے، حالانکہ حکومتی کارکردگی کے محکمہ کے سربراہ اور صدر ٹرمپ کے ’پہلے دوست‘ کی حیثیت سے ایلون مسک وفاقی بجٹ میں کٹوتیوں کے حامی رہے ہیں۔
ٹیسلا سے اس معاہدے کے انکشاف کے ایلون مسک کی دوسری کمپنی اسپیس ایکس کے ساتھ 38.5 ملین ڈالر کے معاہدے کی خبروں پر بھی امریکی شہریوں نے سماجی رابطے کی ویب سائٹ پر انہیں تنقید کا نشانہ بنایا ہے۔
