عید پر ثانیہ اور میں ساتھ ہوتے تو اچھا ہوتا: شعیب ملک

کرکٹر شعیب ملک نے کہا ہے کہ عیدالفطر کے موقع پر وہ اور ثانیہ مرزا ساتھ ہوتے تو اچھا ہوتا۔ ایک ٹی وی پروگرام میں گفتگو کرتے ہوئے شعیب ملک کا کہنا تھا کہ کہ عید کے موقع پر میں اور ثانیہ ساتھ ہوتے تو اچھا ہوتا لیکن ان کی اپنی مصروفیات ہیں جس کی وجہ سے میں اور ثانیہ ساتھ نہیں ہیں۔

شو کے میزبان نے شعیب ملک سے پوچھا کہ ’خبریں چل رہی ہیں کہ ثانیہ مرزا کے ساتھ آپ کے تعلقات اچھےنہیں، میں زیادہ گہرائی میں نہیں جاؤں گا، آپ عید کے موقع پر کیا جواب دینا چاہیں گے؟اس پر شعیب ملک نے کہا کہ کچھ نہیں، یہی کہ عید کے موقع پر میں اور ثانیہ ساتھ ہوتے تو اچھا ہوتا۔

شعیب ملک نے مزید کہا کہ ہمیشہ کی طرح دونوں میاں بیوی کے درمیان پیار اور محبت موجود ہے۔ اپنی اہلیہ کے نام خصوصی پیغام میں انہوں نےکہا کہ ’میں ثانیہ مرزا کو عید کی مبارک باد دوں گا، میں انہیں مسِ ضرور کرتا ہوں، عید کے دن ہم اپنے سب سے قریبی لوگوں کو ہی یاد کرتے ہیں۔‘شعیب ملک نے بتایا کہ ان کے بیٹے اذہان سے ان کی دن میں دو بار ویڈیو کال پر بات ہوجاتی ہے۔

یاد رہے کہ گزشتہ سال نومبر سے سٹار جوڑے کے درمیان علیحدگی کی افواہیں چل رہی تھیں۔ ایک خلیجی اخبار نے بھی رپورٹ کیا تھا کہ شعیب ملک اور ثانیہ مرزا کی شادی 12 سال رہنے کے بعد ان کے درمیان علیحدگی ہو رہی ہے۔ اس دوران ثانیہ مرزا بیٹے کے ہمراہ اکیلے عمرہ ادا کرنے گئی جس کے بعد ان افواہوں نے زور پکڑا۔تاہم اس حوالے سے شعیب اور ثانیہ کی جانب سے باضابطہ طور پر کوئی بیان سامنے نہیں آیا تھا۔