پاکستان مسلم لیگ ن کی نائب صدر اور چیف آرگنائزر مریم نواز عمرہ ادا کرنے کے بعد وطن واپس پہنچ گئیں۔
نائب صدر مسلم لیگ ن مریم نواز نے رمضان المبارک کا آخری عشرہ اپنے والد اور سابق وزیراعظم میاں نواز شریف کے ہمراہ حرمین شریفین میں گزارا۔ انہوں نے اہل خانہ کے ہمراہ عید الفطر کے ایام بھی وہیں پر گزارے۔
مریم نواز غیر ملکی ایئر لائن کی پرواز ایس وی 738 کے ذریعے جدہ سے لاہور کے علامہ اقبال انٹرنیشنل ایئرپورٹ پہنچیں۔
ایئرپورٹ پر کارکنوں کی بڑی تعداد نے مریم نواز کا والہانہ استقبال کیا، اپنی رہنما پر پھولوں کی پتیاں نچھاور کیں اور نعرے لگائے۔
مریم نواز نے ایئرپورٹ پر کارکنان کے نعروں کے جواب میں کہا کہ اللہ اس ملک کو سلامت رکھے۔
واضح رہے کہ مریم نواز اور میاں نواز شریف سعودی عرب میں شاہی خاندان کے خصوصی مہمان تھے، انہوں نے سعودی شاہی قیادت سے ملاقاتیں بھی کیں۔
دوسری طرف سابق وزیر اعظم نواز شریف جدہ سے لندن کے لیے روانہ ہو گئے۔
