وزیراعظم شہباز شریف کے اعتماد کے ووٹ کا فیصلہ آج عدالتی فیصلے کے بعد ہوگا، سپریم کورٹ کے 3 رکنی بینچ نے وزیراعظم کے پاس اکثریت نہ ہونے کی آبزرویشن دی تھی۔
ذرائع کے مطابق وزیراعظم شہباز شریف کے اعتماد کے ووٹ کے معاملے پر قومی اسمبلی سیکرٹریٹ کو آج ضمنی ایجنڈا تیار رکھنے کا حکم دے دیا گیا ہے۔
ذرائع نے کہا ہے کہ آج عدالتی فیصلہ آنے کے بعد اعتماد کے ووٹ کا فیصلہ ہو گا۔ اس سلسلے میں تمام حکومتی اراکین کو آج ایوان میں حاضری یقینی بنانے کا حکم بھی دے دیا گیا ہے۔
یاد رہے کہ گزشتہ سماعت پر 3 رکنی بینچ نے وزیراعظم کے پاس اکثریت نہ ہونے کی آبزرویشن دی تھی۔ وزیراعظم کو اعتماد کے ووٹ کے لیے بھی سادہ اکثریت 172 اراکین کی ضرورت ہے۔ اعتماد کا ووٹ اوپن ووٹنگ کے ذریعے ہو گا۔
ملک میں ایک ساتھ الیکشن پر اتفاق کے لیے سیاسی جماعتوں کو دی گئی مہلت ختم ہو چکی ہے۔ اس حوالے سے درخواستوں پر سماعت آج سپریم کورٹ ہو گی۔ چیف جسٹس کی سربراہی میں 3 رکنی بینچ کیس کی سماعت کرے گا۔
