وزیر اعلیٰ بلوچستان میر سرفراز بگٹی نے نوشکی میں پولیس موبائل پر حملے کی مذمت کرتے ہوئے کہا ہے کہ 4 پولیس اہلکاروں کی شہادت اور منگچر میں 4 مزدوروں کا قتل وحشیانہ کارروائی ہے، ذمہ داروں کو کیفر کردار تک پہنچائیں گے۔
یہ بھی پڑھیں:قلات میں نامعلوم افراد کی فائرنگ، 4 مزدور جاں بحق
اپنے ایک بیان میں انہوں نے کہا کہ پولیس اہلکاروں اور بے گناہ مزدوروں کا خون رائیگاں نہیں جائے گا، دہشتگردوں اور ان کے سہولت کاروں کے لیے بلوچستان میں کوئی جگہ نہیں۔
وزیر اعلیٰ کا کہنا تھا کہ دشمن عناصر کی کمر توڑ کر امن کی بحالی یقینی بنائیں گے، ریاست دشمنوں کو نشان عبرت بنایا جائے گا، دہشتگرد کسی رعایت کے مستحق نہیں۔
انہوں نے کہا کہ پولیس اور سیکیورٹی فورسز کو بھرپور وسائل فراہم کرکے دہشتگردوں کا خاتمہ یقینی بنائیں گے، عوام کے جان و مال کا تحفظ حکومت کی اولین ترجیح ہے، کسی بھی قیمت پر امن خراب نہیں ہونے دیں گے، خون بہانے والوں کو بلوچستان میں چھپنے نہیں دیں گے، کارروائی کا حکم دے دیا ہے۔
