پاکستان کی قومی کرکٹ ٹیم ون ڈے انٹرنیشنل میں 500 میچ جیتنے والی دنیا کی تیسری ٹیم بن گئی۔ راولپنڈی اسٹیڈیم میں نیوزی لینڈ کے خلاف پہلا ایک روزہ میچ جیت کر گرین شرٹس نے ون ڈے انٹرنیشنل میں مجموعی طور پر 500 فتوحات مکمل کر لیں۔
پاکستان سے قبل آسٹریلیا اور بھارت کی ٹیمیں یہ اعزاز حاصل کر چکی ہیں۔ پاکستان نے 500 فتوحات اپنے 949 ویں ون ڈے میچ میں مکمل کیں۔ آسٹریلوی ٹیم اب تک 978 میچ کھیل کر 594 جبکہ بھارتی ٹیم 1029 میچ کھیل کر 539 ون ڈے میچ جیت چکی ہے۔
واضح رہے کہ پاکستان نے اب تک افغانستان کے خلاف 4، آسٹریلیا کے خلاف 34، بنگلہ دیش کے خلاف 32، کینیڈا کے خلاف 2، انگلینڈ کے خلاف 32، ہانگ کانگ کے خلاف 3، بھارت کے خلاف 73، آئرلینڈ کے خلاف 5، کینیا کے خلاف 6، نمیبیا کے خلاف ایک، نیدرلینڈز کے خلاف 6 ، نیوزی لینڈ کے خلاف 57، سکاٹ لینڈ کے خلاف 3، جنوبی افریقہ کے خلاف 30، سری لنکا کے خلاف 92، یو اے ای کے خلاف 3، ویسٹ انڈیز کے خلاف 63 اور زمبابوے کے خلاف 54 فتوحات حاصل کی ہیں۔
پاکستان اور نیوزی لینڈ کرکٹ ٹیموں کے درمیان 5 ون ڈے میچز کا دوسرا میچ (کل) کھیلا جائے گا
پاکستان اور نیوزی لینڈ کی کرکٹ ٹیموں کے درمیان 5 ون ڈے میچوں کی سیریز کا دوسرا میچ کل ( ہفتہ کو ) راولپنڈی کرکٹ سٹیڈیم میں کھیلا جائے گا۔ دونوں ٹیموں کے درمیان میچ ڈے نائٹ ہوگا جو پاکستان کے معیاری وقت کے مطابق سہ پہر ساڑھے تین بجے ہو گا۔ پاکستان کو 5 میچوں کی سیریز میں کیویز کے خلاف 0-1 کی برتری حاصل ہے۔
گرین شرٹس نے پہلے ایک روزہ میچ میں مہمان نیوزی لینڈ کی ٹیم کو 5 وکٹوں سے شکست دی تھی۔ اس سے قبل دونوں ٹیموں کے درمیان پانچ ٹی 20 انٹرنیشنل میچوں کی سیریز 2-2 سے برابر رہی جبکہ ایک میچ بارش کی نذر ہو گیا تھا۔
ون ڈے سیریز کا دوسرا میچ ( کل) راولپنڈی کرکٹ سٹیڈیم میں ہی کھیلا جائے گا۔ ایک روز میچوں کی سیریز میں گرین شرٹس کو مایہ ناز بیٹر بابر اعظم لیڈ کریں گے جبکہ دیگر نمایاں کھلاڑیوں میں شاداب خان، محمد رضوان، شاہین شاہ آفریدی، فخر زمان اور حارث رؤف شامل ہیں۔
مہمان ٹیم نیوزی لینڈ اوپنر بیٹر ٹام لیتھم کی زیر قیادت میدان میں اترے گی اور انہیں جیمز نیشم، ایڈم ملن، ٹام بلنڈل، ڈیرل مچل، مارک چیپمین جیسے بہترین کھلاڑیوں کی خدمات حاصل ہیں۔
دونوں ٹیموں کے درمیان سیریز کا تیسرا میچ 3 مئی، چوتھا میچ 5 مئی جبکہ پانچواں اور آخری میچ 7 مئی کو کھیلا جائے گا۔ پہلے 2 میچ راولپنڈی کرکٹ سٹیڈیم جبکہ آخری 3 میچ نیشنل سٹیڈیم کراچی میں کھیلے جائیں گے۔
