پاکستان میں ہونے والی ڈیجیٹل مردم شماری میں 15 مئی تک توسیع کر دی گئی ہے اور اس کا باقاعدہ نوٹیفکیشن جاری کردیا گیا ہے۔
ادارہ شماریات پاکستان کے نوٹیفکیشن کے مطابق ملک میں ساتویں مردم شماری کا کام 15 مئی تک مکمل کیا جائے گا۔ دو ہفتوں کی توسیع اس لیے کی گئی ہے کہ اس دوران رہ جانے والے اضلاع میں فیلڈ ورک مکمل کیا جائے گا۔
ادارہ شماریات نے بتایا ہے کہ مردم شماری کے وقت میں توسیع کا فیصلہ سینسز مانیٹرنگ کمیٹی نے صوبائی حکومتوں کی سفارش پر کیا ہے۔
ادارہ شماریات کے نوٹیفکیشن کے مطابق رہ جانے والے اضلاع میں فیلڈ ورک کے دوران مردم شماری ڈیٹا کی تصدیق کی جا سکے گی۔
واضح رہے کہ اس سے قبل 4 بار مردم شماری کے وقت میں توسیع کی گئی ہے اور یہ پانچویں مرتبہ ایسا ہوا ہے کہ 15 مئی کی حتمی تاریخ دی گئی ہے۔
اس سے قبل پہلی بار 10 اپریل، دوسری مرتبہ 15 اپریل، تیسری مرتبہ 20 اپریل اور چوتھی بار 30 اپریل تک وقت میں توسیع کی گئی تھی۔
دوسری جانب سے اب تک ہونے والی مردم شماری کے اعداد وشماری بھی جاری کر دیے گئے ہیں جس کے مطابق اب تک ملک بھر میں 23 کروڑ 90 لاکھ 17 ہزار 494 افراد کو شمار کیا گیا ہے۔
