دو ایٹمی طاقتیں ٹکرائیں تو دنیا بھی اس کا نقصان برداشت نہیں کرسکے گی، رانا ثنااللہ

مسلم لیگ ن کے سینیئر رہنما اور وزیراعظم کے مشیر رانا ثنا اللہ نے کہا ہے کہ پلوامہ حملہ مودی حکومت کا ایک ڈراما ہی تھا جس کا مقصد انتخابات میں کامیابی تھی، اس کا کرارا جواب انہیں مل گیا۔

ایک نجی ٹی وی چینل کے پروگرام میں گفتگو کرتے ہوئے ان کا کہنا تھا کہ جنگ 2 نیوکلیئر ملکوں کی تباہی پر منتج ہوتی ہے، اس کی تباہی دنیا بھی برداشت نہیں کرسکتی، مودی حکومت نے پہلگام میں بھی ڈراما کیا ہے، ان کی پوری سیاست پاکستان مخالف جذبات ابھارنے کے گرد گھومتی ہے۔

یہ بھی پڑھیے: پاک بھارت جوہری جنگ دنیا کے لیے کتنی مہلک ہوسکتی ہے؟

رانا ثنا اللہ نے کہا کہ انڈیا کی طرف سے پاکستان پر حملے کا امکان صفر ہے، پاکستان کی دفاعی صلاحیتیں اور افواج مضبوط ہیں۔ ہندوستان کبھی پاکستان پر حملے کا سوچ بھی نہیں سکتا۔

انہوں نے کہا ہے کہ انڈیا ڈراما کرسکتا ہے، وہ کسی ہدف پر اسٹرائیک کرسکتا ہے مگر جنگ مسلط کرنے کا سوال ہی پیدا نہیں ہوتا، کیوں کہ ان کو پتا ہے کہ اس کے نتائج پاکستان سے زیادہ ہندوستان کے لیے تباہ کن ہوں گے۔

یہ بھی پڑھیے: اسحاق ڈار کا قطر کے وزیراعظم سے ٹیلیفونک رابطہ، بھارت کے یکطرفہ اقدامات سے آگاہ کیا

لیگی رہنما نے کہا کہ پہلگام کے واقعے میں انڈیا نے جو ڈراما بازی کی ہے اس کا پاکستان نے موثر جواب دیا ہے۔