اسٹیٹ بینک آف پاکستان نے نئی مانیٹری پالیسی کے تحت شرح سود میں ایک فیصد کمی کا اعلان کردیا ہے۔
ایک فیصد کمی کے بعد شرح سود 12 سے 11 فیصد پر آگئی ہے۔ اس کمی کا مقصد کاروباری لاگت میں کمی اور معاشی سرگرمیوں کا فروغ ہے۔
اسٹیٹ بینک کا کہنا ہے کہ ملک میں مہنگائی کا منظرنامہ پچھلے تخمینے کے مقابلے میں مزید بہتر ہوا ہے اور عمومی مہنگائی میں کمی کا رجحان اپریل کے مہینے میں بھی جاری رہا، مہنگائی 5 سے 7 فیصد کے ہدف کے اندر مستحکم ہوجائے گی۔
یہ بھی پڑھیے: اسٹیٹ بینک کا شرح سود میں کمی کا اعلان، نئی مانیٹری پالیسی جاری
اسٹیٹ بینک کے اعلامیے میں امید ظاہر کی گئی ہے کہ جون تک زرمبادلہ کے ذخائر بڑھ کر 14 ارب ڈالرز تک پہنچ جائیں گے۔
اعلامیے میں کہا گیا ہے کہ ٹیرف کی وجہ سے غیریقینی کی صورتحال ملکی معیشت پر اثرانداز ہوسکتی ہے اور بین الاقوامی سیاسی حالات معیشت کے لیے چیلنج بن سکتے ہیں۔
واضح رہے کہ رواں مالی سال کے دوران اسٹیٹ بینک ملک میں شرح سود میں 10 فیصد کی بڑی کمی کرچکا ہے تاہم مختلف کاروباری حلقوں کا مطالبہ ہے کہ شرح سود کو سنگل ڈیجٹ پر لایا جائے۔
