بھارت اور پاکستان کے درمیان بڑھتی ہوئی سرحدی کشیدگی کے پیش نظر بھارتی کرکٹ بورڈ (بی سی سی آئی) نے انڈین پریمیئر لیگ (آئی پی ایل) 2025 کو معطل کرنے کا فیصلہ کرلیا ہے اور اس سلسلے میں باضابطہ اعلان جلد متوقع ہے۔
یہ پیشرفت اس وقت سامنے آئی جب آئی پی ایل نے جمعرات کے روز دھرم شالہ میں پنجاب کنگز اور دہلی کیپیٹلز کے درمیان جاری میچ کو پہلی اننگز کے دوران ہی منسوخ کردیا۔ دھرم شالہ اور قریبی علاقوں کے ہوائی اڈے بند ہونے کے باعث، دونوں ٹیموں کے کھلاڑیوں اور معاون عملے کو جمعے کی صبح ایک خصوصی ٹرین کے ذریعے دہلی منتقل کیا گیا، جس کا انتظام آئی پی ایل انتظامیہ نے کیا تھا۔
مزید پڑھیں: پاکستان کے حملے کا خوف، دھرم شالہ میں آئی پی ایل کا میچ 10 اوورز بعد ہی ختم
آئی پی ایل 2025 اب تک 58 میچز مکمل کرچکا ہے، جن میں دھرم شالہ کا منسوخ شدہ میچ بھی شامل ہے۔ گروپ مرحلے کے 12 میچ باقی تھے، جنہیں لکھنؤ (2)، حیدرآباد، احمد آباد (3)، دہلی، چنئی، بنگلورو (2)، ممبئی اور جے پور میں منعقد ہونا تھا، جب کہ پلے آف مرحلے کے میچز حیدرآباد اور کولکتہ میں شیڈول تھے۔
دونوں ممالک کے درمیان ہونے والی کشیدگی کے سبب آئی پی ایل میں شامل غیر ملکی کھلاڑی خوفزدہ اور پریشان تھے۔ بھارتی کھلاڑی نے میڈیا کو بتایا کہ سیکیورٹی سے متعلق غیر ملکی کھلاڑیوں میں شدید خوف پایا جارہا تھا جبکہ آسٹریلوی میڈیا پہلے ہی کہہ چکا تھا کہ لیگ میں شامل آسٹریلوی کھلاڑی بھارت میں موجودگی پر تحفظات رکھتے ہیں اور وہ ملک واپسی کے لیے مکمل طور پر تیار ہیں۔
