پیغام رسانی کی معروف ایپ واٹس ایپ صارفین کی سہولت کے لیے نِت نئی تبدیلیاں کرتی رہتی ہے، وہ حال ہی میں ایک بار پھر فیچر اپڈیٹ کرنے کو تیار ہے، اب کی بار واٹس ایپ اپنے صارفین کے لیے انسٹاگرام جیسی سہولت لے کر آیا ہے۔
اس نئے فیچر کے ذریعے واٹس ایپ پر شیئر کیے جانے والے سٹیٹس اب فیس بُک کی سٹوری پر بھی شیئر کیے جا سکیں گے۔
واٹس ایپ بیٹا انفو کے مطابق یہ فیچر فی الحال اینڈرائیڈ فون میں ٹیسٹر کے طور پر متعارف کرایا گیا ہے جسے آنے والے دنوں میں آئی او ایس کےصارفین کے لیے بھی پیش کر دیا جائے گا۔
پہلے اس سہولت سے صرف انسٹا گرام کے صارفین مستفید ہوتے تھے۔ وہ اپنی پوسٹ کی گئی سٹوری کو فیس بُک پر بھی شیئر کر سکتے تھے۔
اس سے قبل واٹس ایپ گروپ کالز کو شیڈول کرانے کے فیچر پر بھی کام شروع کیا گیا ہے جس میں دن اور وقت کا انتخاب کر کے کال شیڈول کی جا سکے گی۔
سٹوری اور کال کے علاوہ واٹس ایپ نے ’نیو ٹیکسٹ ایڈیٹر‘ کا فیچر بھی متعارف کرایا ہے جس کے تحت صارفین مخلتف فونٹس کا استعمال کر سکیں گے اور بیک گراؤنڈ کا رنگ بھی تبدیل کر سکتے ہیں۔
ان تمام فیچرز کے ساتھ واٹس ایپ ایک اور فیچر پر بھی کام کر رہا ہے جسے مستقبل قریب میں متعارف کرایا جائے گا۔ یہ فیچر صارفین کو چیٹ لاک کر کے پوشیدہ رکھنے کی سہولت دے گا تاکہ دوسرے لوگوں کی اس تک رسائی نہ ہو۔
اس نئے فیچر کی مدد سے صارفین اپنی اہم چیٹ کو محفوظ بنا سکیں گے، ایک مرتبہ چیٹ لاک ہو جانے کے بعد پاس کوڈ یا صارف کے فنگر پرنٹ کےذریعے ہی چیٹ تک رسائی ممکن ہوگی۔
