پاک فضائیہ کے سربراہ ایئر چیف مارشل ظہیر احمد بابر صدیق نے راولپنڈی میں شہید اسکواڈرن لیڈر عثمان یوسف شہید کے رہائش گاہ کا دورہ کرکے فاتحہ پڑھی اور غمزدہ خاندان سے تعزیت کا اظہار کیا۔
ایئر چیف نے شہید اسکواڈرن لیڈر عثمان یوسف شہید کو بھرپور خراج عقیدت پیش کیا، جنہوں نے حالیہ بھارتی جارحیت کے دوران ایک حملے میں اپنے فرض کی ادائیگی کے دوران شہادت کا رتبہ حاصل کیا تھا۔
یہ بھی پڑھیے: آرمی چیف کے ہمراہ وزیر اعظم شہباز شریف کا سی ایم ایچ راولپنڈی کا دورہ، زخمیوں کی عیادت کی
چیف آف ایئر اسٹاف نے شہید کے خاندان کو یقین دلایا کہ ہمارے شہدا کی خدمات اور قربانیاں ہمیشہ قوم کی یادداشت میں نقش رہیں گی اور ان کو احترام کے ساتھ یاد کیا جائے گا۔
انہوں نے شہید کے درجات کی بلندی اور لواحقین کے صبر جمیل کے لیے دعا کی۔
بعد ازاں، ایئر چیف مارشل ظہیر احمد بابر صدیق نے سی ایم ایچ راولپنڈی کا دورہ کیا، جہاں انہوں نے بھارتی جارحیت میں زخمی ہونے والے پاک ایئر فورس اور پاک آرمی کے جوانوں اور شہریوں سے ملاقات کی۔
یہ بھی پڑھیے: بولاری ایئر بیس میزائل حملہ اور اسکوارڈن لیڈر عثمان یوسف کی شہادت
انہوں نے زخمیوں کی عیادت کی اور ان کے حوصلے اور عزم کو سراہا۔ ایئر چیف نے اسپتال کے عملے کو ہدایت دی کہ زخمی افراد کو بہترین طبی سہولیات اور انتظامی معاونت فراہم کی جائے۔
اس موقع پر چیف آف ایئر اسٹاف نے پاکستان کی فضائی سرحدوں کے دفاع اور پاک فوج کی دلیری اور فرض شناسی کی روایت کو قائم رکھنے کے عزم کا اعادہ کیا۔
